2010 оны шилдэг унаач Э.Итгэл:”Нэг дор дөрвөн түрүү хүртсэн тэр наадам хамгийн дурсгалтай нь

-Өнгөрсөн оны шилдэг унаачаар шалгарсанд баяр хүргэе. Хичнээн айраг түрүүгээр энэхүү шагналыг хүртсэн бэ?
-Баярлалаа. Улс ,бүс, Их хурд зэрэг томоохон наадмуудаас хоёр түрүү, гурван айраг хүртсэн. Улсын наадамд миний унасан Сүмэн зээрд азарга түрүүлж, хүрэн хязаалан маань долоогоор давхисан. Харин бусад нь 10-20-р давхисан.
-Улсын наадамд хэдэн нас унасан юм бэ?
-Их наснаас бусдыг нь.
-Харин Их хурдад унасан болгон чинь түрүүлж, айрагдсан тийм үү?
-Тиймээ, Дөлгөөн хонгор түрүүлж, Сүмбэн зээрд гурвалсан. Дараа нь Хэнтийн бүсийн наадамд очиж хонгор морио гуравлуулж, хүрэн хязаалангаа тавлуулсан.
-Хэнтийн наадамд бас нэлээд хэдэн нас унасан байхаа. Нэг дор олон насны морь унахад хэцүү юу?
-Зүгээрээ гайгүй. Хэнтийн бүсийн наадамд азарганаас бусдыг нь унасан.
-Одоо хэдэн настай вэ?
- 11 настай.
-Ер нь хэзээнээс эхэлж хурдан морь унаж байгаа вэ?
-Зургаан настайгаасаа эхэлж морь унаж сурсан. Ахаараа заалгаад. Манай ахыг Алтандорж гэдэг юм. 
-Тэгвэл хамгийн анхны айраг түрүү хэзээ байсан бол?
-Морь унаж сураад удаагүй байхдаа Багахангайн наадамд даага тавлуулсан . Түүний дараа  мөн Багахангайн наадамд нэг дор дөрвөн нас  түрүүлгэсэн. Тэр үед маш их баярласан. Ер нь миний хувьд хамгийн дурсгалтай наадам тэр.
-Хамгийн их сэтгэлд үлдсэн, хамгийн хариуцлагатай уралдаан хэзээ байсан бэ?
-Их хурд. Анх удаа шигшмэл морьдын Их хурд уралдаанд оролцоод их өндөр амжилт гаргасандаа баяртай байгаа. Төхөөрөмжнөөс гараад эргэхэд л их гоё санагдсан. Гэхдээ түрүүлнэ гэж бодоогүй. Айрагдах л байх гэж бодож байлаа. Өмнө нь Дөлгөөн хонгорыг унаж байгаагүй болохоор тийм ч итгэлтэй байгаагүй л дээ.
-Ямар цол зэрэгтэй зэрэгтэй вэ?. Ер нь морь унаад авсан хамгийн том бэлэг?
-Ямар нэг цол зэрэггүй. Өнгөрсөн жил азарга унаж түрүүлгээд 2 сая төгрөгөөр шагнуулсан. Тэгээд ээж аавдаа  өгсөн. Харин тэд маань надад биеийн тамирын хувцас,  малгай авч өгсөн.
-Нууц биш бол ямар бэлэг авахыг хүсдэг вэ?
- Унадаг дугуй авахыг хүсдэг. Мөн Бааска ах надад Сувдан зээрдийнхээ төлийг өгнө гэсэн. Тэрэнд их баяртай байгаа.
-Шилдэг унаач маань хэддүгээр ангийн сурагч вэ? Хичээлдээ хэр вэ?
-4 р анги. Хичээлдээ гайгүй. Сая харин нэг D, C-тэй гарчихсан.
-Цаашдын мөрөөдөл?
-Адуунд дуртай учраас том болоод уяач болохыг хүсдэг.
-Уралдааны замд ямар бэрхшээл тулгардаг вэ?
-Гайгүй дээ. Гол нь зам сайн байх ёстой. Замд шалбааг энэ тэртэй байвал хэцүү.
-Чинийхээр унаач хүүхдүүдийн хувьд хамгийн их тулгамдсан асуудал гэвэл?
-Тийм асуудал байхгүй дээ.
Баярлалаа.  Унасан болгон чинь түрүүлж айрагдаж байх болтугай. Амжилт, аз хүсье.