Аймгийн Алдарт уяач Г.Энхбаатар: Орон нутгийн чанартай наадмаас 50 гаруй айраг, түрүү авсан

Сүхбаатар аймгийн Онгон сумын баяр наалмаас...
-Одтой сайхан наадсан танд баяр хүргэе. Баяр наадмынхаа сэтгэгдлээс хуваалцахгүй юу?
-Баярлалаа. Онгон сумын маань 90 жилийн ой  өргөн дэлгэр болж, наадам дэг журамтай сайхан болсон. Миний хувьд дөрвөн морь мордуулж, нэг шүдлэнгээ гурваар, нөгөөг нь 20 гаргаж давхиулсан.
-Даага бас айрагдсан байхаа?
-Тэгсээн. Даага бас гурваар давхисан. Нэг  соёолон мордуулсан нь 17, 18-аар давхилааа.
-Айрагдсан үрээнүүдээ танилцуулаач?
-Шүдлэнгийн маань эцэг нь Дорнод аймгийн харьяат аймгийн Алдарт уяач Намжил гэж хүний адуу. Харин эх тал нь болохоор манай сумын харьяат, аймгийн Алдарт уяач Боргилийн адуу. Би эцэг азаргыг нь 2004 оны овоо тахилгаар дааганд нь  авч байсан юм. Хүрэн шүдлэн маань ноднин даагандаа анх уягдаж, суманд нэг уралдаж 10-н хэдээр орсон. Өнгөрсөн жил манай дүүгийн нэр дээр уралддаг байсан юм. Тэгээд энэ хавар надад ирж нэг тахилга наадамд аман хүзүүдээд, 90 жилийн ой болон Дорноговь аймгийн наадамд гурав тус тус гурвалсан. Энэ жил гурав уралдаж, гурав айрагдаад байгаа юм.
-Хүрэн дааганы тухайд?
-Даага нь аймгийн Алдарт уяач Боргил гэдэг хүний адууны алаг азарганы төл. Эх нь манай аавын адууны угшилтай харагч гүү бий. Хавар нэг тахилгад гурвалж, нөгөөд нь зургаалаад, 90 жилийн ойд гурваар давхиж байгаа нь энэ. Сумын ойн дараа дахиж уралдуулаагүй ээ.
-Хүрэн үрээнүүдийн эзэн хэдий үеэс морь уяж байгаа вэ?
-Би 1995 оноос хойш морь уяж байгаа. Одоогийн байдлаар орон нутгийн чанартай наадмаас 50 гаруй айраг, түрүү авч 2008 онд сумын Алдарт, 2012 онд аймгийн Алдарт уяач цолыг тус тус хүртсэн.
-Аймгийн баяр наадмаас хичнээн айрагтай вэ?
-Аймгийн баяр наадамд гурав дөрвөн морь оруулсан. 2008 онд Сүхбаатар аймгийн чанартай бүсийн наадамд их морь гуравт оруулсан. Түүний дараа Дорноговь аймгийн наадамд бас морь айрагдуулж байсан. Би ер нь гол  төлөв Дорноговь руу явж нааддаг юм.
-Баяр наадмынхаа сэтгэгдлээс хуваалцсанд баярлалаа. Дараа дараагийн уралдаануудад нь амжилт хүсье.
А.Энхжил