Адуу юунаас болж шороо иддэг вэ?

Сайн байцгаана уу? Сайхан  намаржиж байна уу?. Энэ удаад та бүхэндээ бас нэгэн чухал сэдвээр бяцхан зөвлөгөө өгье.
Хүйтэн сэрүүний улирал ойртож уяачид хурдан морь, гүү, унагаа тэжээлд оруулж ирэхээр зэхэж буй. Өдийд уяачид, малчдад тулгардаг нэг асуудал бол адуу, мал нь шороо идэх, хог хамах юм. Энэхүү нөхцөл байдал нь юутай холбоотой үүсдэг талаар дараах зөвлөгөөг хүргэж байна.
Адуу шороо идэх үндсэн шалтгаан нь энгийн эрдэс, витамины дутмагшилтай холбоотой. Тэгвэл эрдэс, витамин яагаад дутагддаг вэ?, ямар шинж тэмдгээр түүнийг таних вэ?
Манай орны цаг агаар, орчин нөхцлөөс хамаараад уралдаан, уяа сойлгын үед адуу их хэмжээний шингэний алдагдалд ордог. Өөрөөр хэлбэл адууг хөлслөх, сунгах, тарлах болгонд хөлсөөр эрдэс, витаминаа ялгаруулан алдаж байдаг. Ингэснээр аажмаар тухайн адууны бие махбодид эрдэс, витамины дутмагшил үүсч, түүнийгээ нөхөх үүднээс өөрийн зөн совингоор дутагдсан эрдэс бодисоо хайж эхэлдэг байна. Мэдээж түүний хамгийн түрүүнд идэх зүйл бол шороо. Хэдий чинээ эрдсийн дутагдал их байна, төдий чинээ шороо идэх, хог хамах дуршил нь нэмэгдэнэ. Түүнчлэн зориуд сануулахад энэ эмгэгээр хамгийн их өвчлөх магадлалтай нь гүү байдаг. Уяачид та бүхэн ч үүнийг анзаардаг байх. Гүү өдрийн турш хашаан дотор холхиж  хог хамдаг шүү дээ. Ингэснээр гүүний умсанд өвсний хог шороо удаан хугацаагаар хуримтлагдаж түгжрэн улмаар ходоод гэдэсний хүчтэй хямрал үүсгэж, цаашлаад үхэлд хүргэх аюултай. Та уяа морьд болон гүүгээ  шороо идсэн эсэхийг хараагүй ч дараах шинж тэмдгээр мэдэж болно.
• Сунгахад амьсгаа ихтэй байх
• Гэдсээр нарийсах
• Умсанд түгжрэл үүсвэл хий дүүрнэ
• Гэдсээ /хэвлийгээ/ ажиглах, үнэрлэх, хөрвөөх
• Шүдээ хавирах гэх мэт шинж тэмдэг илэрнэ.
Эмчилгээ, урьдчилан сэргийлэх:
-Эрдсийн дутмагшил нөхөх
Нэг үеэ бодвол уяачид адууны нэмэлт витамин хэрэглэж сурсан байна. Энэ нь тун зүйтэй юм. Гэхдээ тун хэмжээг нь зөв тохируулж тогтмол уулгах хэрэгтэй.
-Хужир болон ашигт долооц нунтаг эрдэс тэжээлд нь хольж өгөх
-Хашаа хорооны ариун цэвэр сахих
Нэгэнт шороо идсэн бол яаж гаргах вэ?
Шороо идсэн тохиолдолд идсэн шороог гадагшлуулах үйлчилгээтэй бодис байдаг. Psyllium Husk нэртэй энэхүү бодис нь ургамлын гаралтай бөгөөд адууны гэдсэнд орж гэдэсний хананд наалдсан шороог өөртөө наалдуулан авч баасаар гадагшлуулдаг.
Энэхүү бодис орсон Sandexpell гэдэг нэртэй бүтээгдэхүүн манай улсад худалдаалагдаж байгааг дуулгахад таатай байна.
“Жонон” мал эмнэлэгийн их эмч М.Мөнхбаатар