МУ-ын Алдарт уяач С.Лувсанбалдан: Халтар азарга өнөө жил улс, бүсийн чанартай наадмаас дөрвөн айраг хүртсэн

АХ-ын 94 жилийн ойн баяр наадмаас...
-Цолоо мялаан амжилттай наадсан танд баяр хүргэе.
-Баярлалаа. Халтар азарга маань энэ жил улс, бүсийн чанартай дөрвөн наадамд айрагдаж, сайхан наадлаа. Хавар Сэлэнгэ аймагт болсон бүсийн уралдаанд дөрвөөр давхиад, улсын наадамд гурвалж, Өвөрхангай аймагт болсон төвийн бүс болон уяачдын холбооны 20 жилийн ойд тус тус дөрвөлсөн шүү дээ.
-Өнөө жил улсын наадамд хэдэн насны морь мордуулсан бэ?
-Энэ жилийн хувьд азарга, даага, шүдлэн мордуулсан. Азарга маань айрагдаж, шүдлэнгүүд маань хасагдчихсан байна лээ. Уг нь монгол үрээнүүд л дээ.
-Шүдлэнгийн уралдааны тухайд сэтгэл дундуур үлдсэн уяачид цөөнгүй байна лээ?
–Тэгэлгүй яахав. Нийт бүртгүүлсэн үрээний 60-аас илүү хувийг нь хасчихаар аргагүй шүү дээ. Би олон  уяачидтай гэмгүй сайхан нөхөрлөдөг. Энэ тухайд  дэмжиж байгаа нь цөөн байна лээ шүү.
-Үрээгээ хасуулсан уяачид “энд тэнд түрүүлж, айрагдсан үрээнүүдийг нь бодлогоор хасчихлаа” гэж байсан?
-Би  тэгж арай хэлмээргүй байна. Гэхдээ хүмүүсийн дунд тиймэрхүү  яриа байсныг үгүйсгэхгүй. Миний хоёр шүдлэн үнэхээрийн сайн байсан нь үнэн. Айрагдаж, түрүүлэх магадлалтай шүдлэнгүүдийн урд нь ч байсан, ард нь ч байсан. Гэхдээ ах нь элдэв зүйл ярихгүй ээ. Гол нь олон уяачийн эрх ашиг хөндөгдөж байгаа болохоор хэлж байгаа юм.
-АХ-ын 90 жилийн ойгоор шүдлэн айрагдуулж байсныг тань санаж байна. Ингэхэд хэд дэх жилдээ төрийн наадамд морь мордуулж байгаа юм бэ?
-17,18 жил болчихсон байна. Морь унадаг байснаасаа тооцвол бүр 30-40 жил болох байхаа. Би чинь хөдөөний хүүхэд шүү дээ. Төрийн зарлигтай наадмын анхны айргаа Дүнжингаравын хурд уралдаанаас авч байсан. Хонгор халзан азарга маань айрагдаж байлаа. Яг улсын наадмынх гэвэл өөрийн чинь яриад байгаа 2011 он л доо.
-Өнөө жилийн баяр наадам  ямар онцлогтой байсан бол?
-Ган гачиг л байна даа. Бороо хур багатай наадмууд байсан ч өнөө жилийнх шиг ингэтлээ улаанаараа эргэлдэж байгаагүй. Байгал цаг агаарын энэ байдал морьдын уяа сойлгонд тодорхой хэмжээгээр нөлөөлсөн байх. Харин наадмын дараагаар бороо ороод газрын өнгө аятайхан боллоо шүү.
-ММСУХ 20 жилийн ойгоо тэмдэглэж байна. Холбооныхоо үйл ажиллагааны талаар ямар бодолтой явдаг вэ?
-Сэтгэл хангалуун байдаг шүү. Сая 20 жилийн ойн баяр наадам ч их сайхан болсон.
-Бидний урилгыг хүлээн авч ярилцсанд баярлалаа.
А.Энхжил