Аймгийн Алдарт уяач М.Ганболд: Дөрвөн насны морь мордуулж, алаг үрээгээ айрагдууллаа

А.Тэлмэн
2015 оны 12-р сарын 11 -нд

АХ-ын 94 жилийн ойн баяр наадмаас...
-АХ-94 жилийн ой, үндэсний их баяр наадамд алаг үрээгээ айрагдуулсан танд баяр хүргэе. Баяр наадмын сэтгэгдлээсээ хуваалцахгүй юу?
-Баярлалаа. АХ-ын 94 жилийн ойн баяр наадам өргөн дэлгэр сайхан боллоо. Өнөө жил би төрийнхөө наадамд их нас, соёолон, хязаалан, эрлийз дунд гэсэн дөрвөн насны морь мордуулж, алаг үрээ айрагдууллаа.
-Бусад насны морьд яаж давхисан бэ?
-Хээр соёолон долоогоор, хязаалан 40-н хэдээр давхисан. Харин их насны морь маань жаахан тааруухан байсан болохоор замаас нь татуулчихсан.
-Улсын наадмын дараа хаана наадсан билээ?
-Булган аймагт болсон хангайн бүсийн уралдааныг зорьж очоод алаг үрээгээ гурваар давхиулсан.
-Булганд хэдэн насны морь мордуулсан бэ?
-Таван насны морь мордуулсан. Алаг үрээ айрагдаж, бусад нь арав гаргаад давхисан даа.
-Булган аймгийг буюу хангайн бүсийг яагаад онцолсон юм бэ?
-Манай адуу Булган аймгийн Баяннуур суманд нутагладаг байгаад бууриа сэлгэн өнөө жил Сүхбаатар аймгийн Түмэнцогт  сум руу явсан юм. Нэгдүгээрт адуу малаа адгуулж байсан нутагтаа болж буй том уралдаанд уралдах нь зүйтэй гэж үзсэн. Хоёрдугаарт би чинь хоёр жил говийн аймаг руу явж наадаад хаширсан хүн шүү дээ. Хангай газрын адуунд таана зохихгүй юм билээ.
-Хангайн бүсийн уралдааны тухайд ямар бодолтой байгаа вэ?
-Булганы наадам сайхан болсоон. Зохион байгуулалт болон өвс ногоо сайтай, сайхан наадам болсон. Энэ жил газрын гарц муу байсан болохоор  улсын наадамд ихэнх морьдоо явуулаагүй авч үлдээд, Булганы бүсэд уралдуулсан. Би гурван их морь, хоёр соёолон, хоёр хязаалан, нэг шүдлэнтэй очиж, бүгдийг нь модтой давхиулсан. 
-Дөрвөн тэгш ой давхцсан жил улсын наадамд соёолон айрагдуулж байсныг тань санаж байна. Одоогоор улс бүсийн наадмаас хичнээн айраг, түрүү хүртээд байгаа вэ?
-Нэг түрүү, гурван айрагтай. Үүнээс гадна бүсийн наадмын гурван ч зургаа бий. Олон удаа айргаас хасагдах бас яггүй юм билээ шүү. Ховдод болсон баруун бүсийн наадамд бол яах аргагүй зургаалсан юм. Говь-Алтай аймагт болсон баруун бүсийн наадамд болохоор түрүүлж ирээд тугны гадуур орчихоор нь, буцаагаад тойруулах гэсээр байтал арын морьд нь орчихсон. Өмнөговьд болохоор урд талынх нь морь шогшоод байдаг, миний морь тарлаад байдаг. Тэгсээр зурхай дээр нөгөөх түрүүлээд гишгэчихсэн.
-Хурдан морь өөрийнх нь төлөө сэтгэл зүрхээ зориулж яваа нэгнийг заавал баярлуулдаг гэдэг. Баярын магнай тэнийх өдөр ойрхон байгаа байхаа?
-/инээв/ Тэгэх байхаа.
-Ингэхэд хэд дэх жилдээ төрийн наадамд морь мордуулж байгаа юм бэ?
 -2010 оноос хойш гэхээр таван жил болж байгаа юмуу даа. Би чинь 2007 оноос морь уяж байгаа харьцангуй залуу уяач шүү дээ.
-Залуу уяачийн хийморь өөдөө байг. Ярилцсанд баярлалаа.
А.Энхжил

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна