Аймгийн Алдарт уяач Ё.Ууганбаяр: Хар азарга маань завсаргүй тав айрагдсан

Завхан аймгийн Их-Уул сумын уугуул, аймгийн Алдарт уяач Ё.Ууганбаярын ярилцлагыг уншигч танаа хүргэж байна.
-Морь уях төрийн хэрэгт хэзээнээс шамдах болсон бэ?
-Би айлын ганц өргөмөл хүү. Хэдийгээр аав маань морь мал уядаггүй Их-Уул, Цагаанхайрхан сумдад малын зоо техникчээр ажиллаж байсан ч би багын адуунд дуртай хүүхэд байсан. Ямар сайндаа морины сүүл шууж наадам хэсмээр санагдаад хурдан хүлэгтэй хувь заяагаа холбоё хэмээн Чүлтэмсүрэн гэж найзтайгаа хамтран бор халтар морио уяж байхав.
 -Тэгвэл анх удаа асарын өмнө цоллуулсан баярт мөч хэзээ байсан бэ?
-Хөвсгөл аймгийн Төмөрбулаг сумын харьяат Далай гэж хүнээс шарга морь, Сайнбаяр гэдэг хүнээс хар азарга авсан юм. Хар азарга 1999 оноос эхлээд Их-Уул сумандаа тасралтгүй таван жил айрагдсан. Харин шарга морь нь 2004 онд сумандаа аман хүзүүдсэн. Тэр жил хар азарга маань бас айрагдаад би гэдэг хүн сумынхаа наадамд хоёр дээд нас айрагдуулж байлаа. Одоо хар азарганыхаа төлүүдээр наадаж байна. Хар азарганы маань төл миний өөрийн унаган хээр гүүнээс гарсан хоёр хээр морь маань ид хурдан байгаа.
-Хээр морьд тэгээд яаж давхиж байна?
-Том хээр морь маань шүдлэнгээс нь эхэлж уягдан сумын наадамд байнга айрагдаж байгаа. Өнгөрсөн жил тойрсон зургаан овооны наадамд болон Гончигдамба Гарьдын мялаалга наадамд бүгдэд нь айрагдсан.Одоо 10 настай морь байна. Харин бага хээр нь соёолондоо сумынхаа наадамд айрагдсанаас хойш хоолоо тогтоохоо больчихоод байсан чинь энэ жилээс харин сайхан засагдаад хоёр ч овооны наадамд айрагдчихлаа.
-Шавь нар цөөнгүй бололтой. Өөрийг тань дагаж морь уядаг гэсэн хэд хэдэн хүнтэй уулзлаа?
-Шавь болоод сүйд болох ч юу байхав. Манай хүргэн дүү Отгоогийн хээр даага Гарьд Гончигдамбын мялаалга болон сумынхаа баярт аман хүзүүдэж, зуун дааганы уралдаанд түрүүлсэн. Дагвадорж ахын хүрэн азарга сүүлийн үед очсон наадмаасаа айраг алдахгүй байна. Энэ хоёртойгоо уяа нэгдээд ганц нэг мэддэг зүйлээ хэлж өгдөг юм. Мөн Пүрэвдаш, Баасандаш гэж хоёр хүү маань морины ажилд их тусалдаг. Хөвгүүдээ сайн уяач болох байх гэж найддаг шүү.
-Хөвгүүд морь уяж байгаа бол аав адууныхаа чанарыг сайжруулах тал дээр багагүй анхаарч байгаа биз?
- Манай аав Тэс угшлын адуугаар хэсэг сайжруулсан. Дээр нь би хар азарга авч тавиад гайгүй чанартай адуунуудтай болсон гэж боддог. Одоо ер нь унаган адуугаараа л наадаж байгаа шүү дээ.
-Хэдэн онд аймгийн Алдарт уяач цолоо авсан бэ?
-2013 онд аймгийн Алдарт уяач болсон. Тэрнээсээ хойш гурван овооны наадмаас айраг хүртээд байна даа.
-Сэтгэлд хоногшсон сайхан наадмын дурсамжаар яриагаа өндөрлөе.
-Өнгөрсөн жил нутгийнхаа Гарьдын наадмаас хоёр айраг хүртэх л хамгийн сайхан байсан даа. Тэр наадамд хоёр аймгийн 10 гаруй сумын уяачид шигшмэл гэсэн морьдтойгоо ирсэн байсан юм.
-Ийм бахдалт наадмууд олон байх болтугай. Ярилцсанд баярлалаа.

"Тод магнай" сэтгүүл Завхан аймгийн тусгай дугаар