"Дүнжингаравын хурд-2016"-д эхний 15-д хурдалсан эрлийз дээд ангиллын хүлгүүд

Тухайн жилийнхээ өнгийг тольддог хэмээдэг “Дүнжингаравын хурд-2016” уламжлал ёсоор эрлийз дээд насны морьдын уралдаанаар эхэлж, энэ ангилалд  89 /107 бүртгүүлснээс 18 нь тавиач/ хурдан хүлэг шандас  шалгаснаас АХ-ын 69 жилийн ойн баяр наадамд хар хээр даага түрүүлгэж, хул морио айрагдуулж байсан Төв аймгийн Сэргэлэн сумын харьяат, аймгийн Алдарт уяач Лувсандоржийн Дамбадаржаагийн хамар цагаан зээрд соёолон түрүүлэн амжилтын салхийг хагаллаа. Хурдан зээрд  Тод манлай уяач Д.Ононгийн унаган адуу гэнэ билээ. Энэ уралдааны аман хүзүүнд бичин жилийн босгон дээр МУ-ын Манлай уяач цолыг хүртсэн  Төв аймгийн Батсүмбэр сумын уугуул, Сундуйн Лувсанбалдангийн халтар хурдалсан. Сүүлийн жилүүдэд уралдсан болгондоо түрүүлж, айрагдаж буй энэ хүлгийг манай уншигчид эчнээ таних бизээ. Шинэ цагийн адуун шандсыг гайхуулан айргийн гуравт хурдалсан  Төв аймгийн Зуунмод сумын харьяат Дагвасүндэлийн Алтанхуягийн хонгор өнгөрсөн жил болсон Өндөр Гэгээн Занабазарын мэлмий гийсний 380 жилийн ой төвийн бүсийн уралдаанд айрагдаж байсан хурдан буян юм. Энэ уралдааны айргийн дөрөвт Тод манлай уяач Д.Мөнхбатын уясан Төв аймгийн Баянцогт сумын харьяат Даваажавын Даваа-Эрдэнийн хүрэн хурдалсан бол айргийн тавд  Сүхбаатар аймгийн Түмэнцогт сумын харьяат Тод манлай уяач С.Төмөр-Очирын уясан  Саарийсүрэнгийн Гантөмөрийн хүрэн хурдаллаа. Ийнхүү эрлийз дээд насны ангилалд С.Лувсанбалдан, С.Төмөр-Очир нарын уясан морьд айрагдан шинэхэн цолыг нь мялаалаа. Эрлийз дээд насны морьдын уралдааны даамлаар Ц.Жамбалсүрэн, дэд даамлаар Ө.Мөнхтайван нар ажилласан бөгөөд гурван хүүхэд гараан дээр унаж, эмчийн үзлэгээр ямар нэг гэмтэл бэртэлгүй нь тогтоогдсон эцэг, эх асран хамгаалагчид нь хүлээлгэн өгсөн байна. Мөн энэ уралдааны үеэр хоёр морины хөл гэмтсэн гэх мэдээллийг өгсөн юм.
Эрлийз
1.Төв аймгийн Сэргэлэн сумын уугуул, аймгийн Алдарт уяач Лувсандоржийн Дамбадаржаагийн хамар цагаан зээрд. Уралдаанч 13 настай Мягмарсүрэнгийн Отгонжаргал
2.Төв аймгийн Батсүмбэр сумын уугуул, МУ-ын Манлай уяач Сундуйн Лувсанбалдангийн халтар. Уралдаанч 15 настай Төмөрчөдөрийн Сүх-Очир
3.Төв аймгийн Зуунмод сумын уугуул, уяач Дагвасүндэлийн Алтанхуягийн хонгор. Уралдаанч 14 настай Аннхтуяагийн Отгонтөмөр
4.Төв аймгийн Баянцогт сумын уугуул, уяач Даваажавын Даваа-Эрдэнийн хүрэн. Уралдаанч 14 настай Жаргалын Дашзэвэг
5.Сүхбаатар аймгийн Түмэнцогт сумын уугуул, аймгийн Алдарт уяач Сайрийсүрэнгийн Гантөмөрийн хүрэн. Уралдаанч 12 настай Нямдоржийн Нэргүйбаатар
6.Орхон аймгийн Жаргалант сумын уугуул, Дамбацэрэнгийн Мөнхтүвшингийн хээр. Уралдаанч 12 настай Цогбадрахын Хувьзаяа
7.Орхон аймгийн Жаргалант сумын уугуул, уяач Сангийн Цацралын хүрэн. Уралдаанч есөн настай Болдсайханы Бархас
8.Говь-Алтай аймгийн Баян-Уул сумын уугуул, уяач Дагвадоржийн Жамъянгийн хээр. Уралдаанч 14 настай Даваадоржийн Гансүх
9.Төв аймгийн Лүн сумын уугуул, уяач Банзрагчийн Билэгдэмбэрэлийн хээр. Уралдаанч 12 настай Болортолийн Эрхэмшагай
10.Төв аймгийн Сэргэлэн сумын уугуул, аймгийн Алдарт уяач Чулуунбаатарын Гансумын сартай хээр. Уралдаанч есөн настай Мэндбаярын Ундрахбаяр
11.Өвөрхангай аймгийн Баян-Өндөр сумын уугуул, уяач Мандахын Мөнхбатын бор халзан. Уралдаанч найман настай Наранцэцэгийн Билгүүнманлай
12.Өвөрхангай аймгийн Уянга сумын уугуул, уяач Баатарын Даваадоржийн хонгор халзан. Уралдаанч 11 настай Гүндэгмаагийн Отгонбаяр
13.Дундговь аймгийн Луус сумын уугуул, уяач Сэрээгийн Шинэбаатарын хонгор халзан. Уралдаанч 15 настай Чогдонгийн Бямбажав
14.Говь-Алтай аймгийн Баян-Уул сумын уугуул, МУ-ын Тод манлай уяач Дагвадоржийн Цэрэнжигмэдийн зээрд. Уралдаанч 13 настай Батбуянгийн Цэрэндаваа.
15.Ховд аймгийн Дарви сумын уугуул, уяач Намчинцэрэнгийн Даш-Өлзийн зээрд. Уралдаанч 11 настай Хишигжаргалын Содномдорж
А.Мягмарсүрэн