Өрнөдөд морь унаж турах фитнес моодонд орж байна

Цаг үеэ дагаад хүмүүс, ялангуяа охид бүсгүйчүүдийн хамгийн их анхаарал хандуулдаг сэдэв бол илүүдэл жин болоод байна.Тэдний турах хүслийг дагаад тураадаг цай, үрэл, эм тан, фитнес гэх мэт олон зүйлүүд гарч ирсэн. Европ, Америкийн иргэд гэхэд л илүүдэл жингийнхээ эсрэг хэдэн зуун тэрбум долларын хөрөнгө оруулалт хийдэг нь нэгэнт тогтоогджээ. Гэхдээ юунд мөнгө зарж жингээ хасах, хассан жингээ хэрхэн барих вэ гэдэг нь ярвигтай сонголт болоод байгаа аж. Юугаар хийсэн нь мэдэгдэхгүй “шидэт” гэгдсэн эм өндөр үнээр худалдан авч уух уу? Байсхийгээд л хоолоо сойж өөрийгөө зовоох уу? Эцэж унатлаа бэлтгэл хийж, үсэрч харайх уу? Эцэстээ хүмүүс тэс өөр зүйлийг сонгох болсон байна. Сүүлийн үед Өрнөдөд морь унаж турах шинэ моода дэлгэрч, ихээхэн газар аваад байна. Мэдээж энэ турах арга нь цоо шинэ зүйл биш. Эрт цагаас л хүмүүс морь унадаг байсан. Хамгийн гол нь тогтмол морь унадаг хүмүүс т илүүдэл жингийн асуудал байдаггүй. Жишээлбэл, Чингис хааны үеийн монголчуудын байлдан дагуулалтын тухай “Монголчуудын тухай армяны эх сурвалж”-д бичихдээ “монголчуудыг цаг үргэлж морь унадаг, бэлхүүсээрээ шоргоолж шиг нарийн хүмүүс” хэмээсэн байдаг. Ингээд уншигч танаа ялангуяа бүсгүйчүүдэдээ зориулаад морь унахын давуу талыг хүргэе.
Булчин хөгжүүлнэ, өөх хайлуулна
Өнгөц харахад морь унах гэдэг тун амар, ядаад байх зүйлгүй мэт. Хүн суугаад л болоо, морь өөрөө явна, харин ч биед амар гэж ташаарах нь цөөнгүй. Үнэн хэрэг дээрээ хүн өөрийн биеэр морийг удирдаж байдаг тул морь унаж байгаа хүний биеийн бараг бүх булчин байнга ажилладаг. Тэр тусмаа баргийн дасгал хөдөлгөөн хийхэд ачаалладаггүй далд булчингууд ажиллаж булчин шөрмөс бүхэлдээ хөгждөг. Ийм болохоор морь унахгүй удсан хүн хэсэг зуур морь унасны дараа бие хүнд ажил хийсэн мэт буларч хөндүүрлэдэг.Ингэж биеийн бүх булчин ажиллаж байгаа тул их илчлэг зарцуулна. Ялангуяа гуяны дотор хэсэг, гэдэс, нуруу, өгзөгний булчин ачаалладаг. Ачааллаж илчлаг зарцуулна гэдэг тэдгээрт хуримтлагдсан илүүдэл өөх хайлна гэсэн үг. Охид бүсгүйчүүдийн таргалаад байна гэдгийг гол шалтгаан нь гэдэс, гуя, өгзөгний орчим хуримтлагдсан өөх болдог тул морь унах нь тэдгээрийг хайлуулах, гоолиг харагдах хамгийн шилдэг арга гэж болно.
Иллэг хийнэ, цусан хангамжийг сайжруулна
Үүний дээр морины биеийн халуун нь хүнийхээс 1,5 градусаар илүү байдаг бөгөөд алхах, давхихад бүр ч нэмэгддэг. Ийнхүү нэмэгдсэн биеийн дулаан унаж буй хүндээ нөлөөлж, улмаар хүний биеийн дулаан нэмэгддэг нь тогтоогдсон байна. Түүнчлэн морины булчингийн хөдөлгөөнөөр бичил массаж тогтмол хийгдэг тул тухайн хэсгийн цусан хангамж сайжирдаг.Өдөржин компютерийн дэлгэц ширтэн хөдөлгөөнгүй суудаг хүмүүст энэ бичил массаж хамгийн сайнаар нөлөөлдөг. Биеийн тодорхой хэсэгт зарим дасгал хөдөлгөөн хийснээс дутахааргүй халаалт болдог байна. Иймээс мориноос буунгуутаа тэрхүү халаалтаа ашиглан сунгалт хийх, целлюлитын эсрэг тостой хөнгөн массаж хийх нь хүсч буй үр дүндээ богино хугацаанд хүрэхэд тус болохыг анхаарна бизээ.
Эрүүл агаарт хүчил төрөгчөөр эд эсээ баяжуулна
Ямагт эрүүл агаарт, чөлөөтэй  байдаг гэсэн өөр нэг маш том давуу талтай. Ялангуяа, Улаанбаатар гэх мэт хот суурин газруудад утааны асуудал нэн хурц болоод байгааг онцгой анхаарах хэрэгтэй. Олон хүний хөлс, элдэв үнэртэй ус энэ тэр ханхалсан зааланд дасгал хийх үү? Эсвэл эрүүл агаарт морь унаж сэтгэлээ сэргээн өөрөө ч анзааралгүй тайвнаар, амьсгаадалгүйгээр дасгал хийх үү? Эмнэлэг, эмийн сангаас мөнгө төлж авдаг хүчилтөрөгчийг коктейлийг зүгээр авч байгаатай л адил.
Стрессгүй орчин
Олон хүн цугласан газар бэлтгэл сургуулилт хийхэд сэтгэл санааны багагүй стресс, дарамт учирдаг болохыг  жингээ хасах гэж улайрсан хүмүүс тэр бүр анзаардаггүй. Ямар стресс вэ? гэсэн асуулт гарч ирнэ. Дасгалаа зөв хийж чадахгүй байх вий, хажууд байгаа бусад хүн намайг шоолох вий? гэх стресс. Ялангуяа, охид бүсгүйчүүд “үс сэгсийжүү”, “нүүрний будаг энэ тэр хөлсөнд урсчих вий”, “надаас хөлс үнэртэж байгаа болов уу?”, “бүдүүн байна гэж намайг шоолж байгаа байх” гэх мэт байнгын стресстэйгээр фитнест дасгал хийдэг. Эрчүүд нь, “булчин шөрмөс овоож төвийсөн тэвхийсэн дасгалжуулагч бусад залуучуудын хажууд муухай харагдах байх”, “энэ залуугийн өргөж байгаа штангийг би өргөж дийлэхгүй бол онигоонд орж магадгүй тул өргөхгүй байсан нь дээр” гэх мэт бас л байнгын стресстэйгээр дасгал хийдэг. Харин морь унаж байхад ийм стресс огт үүсэхгүй. Унаж байгаа морь чинь таныг хэзээч “Морь унаж чаддаггүй юм байна” гэж шоолохгүй. Нас ахисан бол залуучуудын дэргэд эвгүй харагдана гэж айлтгүй. Ахимаг настай эсвэл насанд хүрээгүй бол хүнд зүйл өргөж болохгүй, хэт ачаалал авч болохгүй гэсэн хориг байдаг бол морь унахад ийм хориг огт байхгүй. Арван тавтай ч бай, 55-тай ч бай морь унаж болно. Японы морин спортын шигшээ багийн тамирчин Хироши Хокецу гэхэд л 71-н настайдаа 2012 онд Лондонд болсон зуны Олимпийн тоглолтонд оролцсон нь үүний тод жишээ. Бусад спортод бол 70 гарсан хүн Олимпийн тэмцээнд өрсөлдөнө гэдэг яаж ч бодоод бүтэхгүй хэрэг.
Ядрахгүй тураана
Морь унаснаар юу нь мэдэгдэхгүй хоосон магтсан эм уух, хүнд жин, хөдөлгөөнийг олон давтаж тэртээ тэргүй ажлын дараа ядарч цуцсан биедээ бүр хүнд ачаалал өгч, стресст оруулах шаардлагагүй болно. Амьсгаадаж, хөлсөө цувуулалгүйгээр хийж байгаа зүйлээсээ кайф авч турна гэсэн үг.Товчхон хэлэхэд морь унах нь өөр ямар ч фитнессээс давуутай хамгийн шилдэг нь юм. Ийм ч болохоор эрүүл мэнд, гоо үзэмжиндээ онцгой анхаардаг Өрнөдөд энэ фитнес моодонд орж, хичээллэдэг хүмүүсийн тоо нэмэгдэхээс ч өөр аргагүй.

Б.Бадрал