Аймгийн Алдарт уяач Б.Зулзага: Намайг даага уяхдаа сайн гэж ярьдаг юм

А.Тэлмэн
2016 оны 5-р сарын 26 -нд

Өөрийн аймаг, сум болон зэргэлдээ аймаг сумын наадмаас 28 түрүү, 43 айраг авч адууныхаа удам угсааг бусад газрын шилмэл хурдан адуугаар сэлбэн сайжруулсан цөөн уяачдын нэг бол Дундговь аймгийн Гурвансайхан сумын уугуул, аймгийн Алдарт уяач Борын Зулзага гуай юм. Хойч залуу үедээ үлгэр дуурайлал болсон хашир туршлагатай Алдарт уяачийн эрдмийг үр хүүхдүүд нь болох З.Бат-Эрдэнэ, З.Эрдэнэбаатар, Б.Баасанхүү нар нь залган уяа эвлүүлж байна.
-Таны төрсөн газар уул ус гэхээр аль хавь болж байна?
-Би 1942 онд  Гурвансайхан сумын нутаг “Баруун тоодог” гэдэг газар  төрсөн. 1975 оноос буюу 17 настайгаасаа эхлэн 1992 он хүртэл нэгдлийн адуучин байлаа. 
-Нэгдлийн аварга адуучин байсан гэл үү?
-Тийм ээ. 1975 онд аймгийн аварга адуучин,   V , VI, VII “5 жилийн гавшгайч” цол тэмдгээр шагнуулж байсан.
-Та аль нутгаас хурдан удмын адуутай болж байв?
-Намайг гурван настай байхад өвөрлөгч хошуунаас Бавуугийн хүү гэдэг шилийн сайн эр арван хэдэн адуу тууж ирээд Баруун тоодог гэдэг газар зарсан гэдэг. Түүнийг дагаж эр бор унага ирсэн юм билээ. Түүгээр манайх азарга тавиад хурд ч гарсан, жороо ч гарсан. Мөн Өндөршил сумын Аригил-Ухна гэдэг хүнээс хүрэн үрээ авч азарга тавьсан. Данзаннямын адууны угшилтай бор азарга ч байсан. Ер нь тэгээд газар газрын хурдтай гэсэн бүхнийг цуглуулах гэж их ч явсан.
-Эртнээс цуглуулсан уу?
-Би 20 настайгаа морь уясан. Тэр цагаас адууны сайнаар уралддаг байсан. Тийм ч учраас аймаг сумаас  олон айраг түрүү авсан байх. Одоо хүүхдүүд маань уяаны гол ажлыг хийж байна даа.
-Нэг наадамд хамгийн олон доо хэдэн айраг түрүү авч байв?
-Сумандаа бол бол дөрөв таван морь хийх үе байсан. Тэр тусмаа даагыг бол цуваагаар нь хүртэл оруулж байсан. 1970 оны дунд үед сумын наадамд гурван даага маань уралдааныг хөтлөөд цуваад ирж байсан. Намайг даага уяхдаа сайн гэж ярьдаг юм билээ. Гэхдээ бусдыг нь ч сайн давхиулж л явлаа.

"Тод магнай" сэтгүүл Дундговь аймгийн тусгай дугаар

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна