Аварга малчин, Алдарт уяач Дугаржавын Иш

БНМАУ-ын Аварга малчин  Хөх овогт Д.Иш нь 1930 онд Хэнтий аймгийн Цэнхэрмандал сумнаа малчин ард Гомбодонойн дөрөв дэх хүү болон мэндэлж, Дугаржавынд үрчлэгджээ. Багаас нүүдэлчин ахуй, мал маллах арга ухаанд суралцан хувийн аж ахуйтнаас эхлээд нэгдлийн малчнаар ажиллаж, төлөвлөгөөт даалгавраа давуулан биелүүлэн 1992 онд БНМАУ ын Аварга малчин хэмээх цолны эзэн болсон тэрээр сайн малчнаас гадна шаггүй уяач байв. Хурдан хүлгийн уяа сойлго тааруулж, уяачийн жаргал зовлонг амталсан он жилүүддээ улс, аймаг, сумын баяр наадмаас 25 түрүү, 60 гаруй айраг хүртсэн агаад  халиун азарга нь Хэнтий аймгийн Цэнхэрмандал, Төв аймгийн Баяндэлгэр сумдад саахалтын зайтай хол түрүүлсэн 1966 оны баяр наадам мартагдашгүй дурсамжийг үлдээсэн гэдэг.
Аварга малчин, Алдарт уяачийн магнайг тэнийлгэн хурдалсан шандаст хүлгүүдийнх нь нэг нь унаган хээр азарга нь. Хээр азарга аймаг, сумын  баяр наадамд  зургаа түрүүлж, 13 айрагдан хүлэг морио эрхэмлэгч эзнийхээ хийморийг өргөж асан бол төл цавьдар халзан азарга нь дааган цагаасаа эхлэн хурдалж,тэр жилээ сумынхаа баяр наадамд түрүүлэн, шүдлэндээ Монголын нууц товчооны 750 жилийн ой бүсийн наадамд түрүүлж, уясан эзэн, унасан хүүхэд, уугуул нутгийн түмнийхээ магнайг тэнийлгэсэн билээ. Хожмоо тэрхүү халзан азарга Ишийн Даншиг халзан хэмээн алдаршиж, аймаг, сумын наадамд 10 гаруй удаа айрагдаж, түрүүлсэн бол түүхт ойн том наадамд унаган хүлгээ түрүүлгэсэн буурал уяачийн хагас зуун жилийн хөдөлмөрийг үнэлж, аймгийн Алдарч уяач цолоор шагнасан юм.

"Тод магнай" сэтгүүл Хэнтий аймгийн тусгай дугаар