“Агт-Эрдэнэ” галынхан “Их хурд” уралдааны түрүүг хоёр дахиа хүртлээ

Гурван жилийн хүлээлттэй  Монголын хамгийн өндөр чансаат уралдаан  “Их хурд” өнгөрсөн ням гарагт Хүйн долоон худгийн торгон ногоон дэвжээнээ  амжилттай зохион байгуулагдлаа.  Ардын хувьсгалын ой, төрийн зарлигтай баяр наадамд түрүүлж, айрагдсан түмэн эхүүд урилгаар оролцдог энэхүү уралдаан долоо дахь удаагаа зохион байгуулагдаж байгаа нь энэ юм. Адуун сүргийн чанар чансаа, уяачийн эрдэм ухааныг тодорхойлогч их насны морьдын уралдаанд шигшмэл 101 хурдан  хүлэг бүртгүүлж гарааны зурхайгаас  нэгэн зэрэг эргэснээс   Төв аймгийн Дэлгэрхаан сумын уугуул, “Агт -Эрдэнэ” галын уяач Шаравын Мөнгөншагайгийн хүрэн түрүүлж, түмэн эхээр тодорлоо. Хүрэн морины уяа сойлгыг “Агт-Эрдэнэ” галын уяач, нийслэлийн Алдарт уяач Г.Буянтогтох тааруулсан бөгөөд есөн настай Буянхишигийн Буянжаргал хүү унаж хурдлуулжээ. Хэдхэн хоногийн өмнө төрийн наадмын түрүү хүртсэн тус гал ийнхүү морины их олимпод хоёр дахь удаагаа их насны морь түрүүлгэлээ. 2010 оны “Их хурд-5” уралдаанд тус галын гишүүн Төв аймгийн Лүн сумын уугуул, аймгийн Алдрт уяач Б.Баасанбазарын Дөлгөөн хонгор морь түрүүлж, Төв аймгийн Баян сумын уугуул, МУ-ын Манлай уяач Х.Цогтсайханы Сүмбэн зээрд азарга айрагдаж  байсныг морь сонирхогчид санаж буй бизээ.
МУ-ын Манлай уяач Д.Оюунбилэг агсны үүсгэн бий болгосон “Агт-Эрдэнэ” гал одоогоор морины их олимпод хамгийн өдөр амжилт үзүүлсэн хамт олон болоод байна.
Шигшмэл морьдын “Их хурд-7” уралдааны аман хүзүүнд Өвөрхангай аймгийн Тарагт сумын уугуул, аймгийн Алдарт уяач Бадралын Энхбаатарын хонгор халзан хурдаллаа. Хэдхэн хоногийн өмнө төрийнхөө их баяр цэнгэл наадамд магнайдаа тоосгүй түрүүлсэн энэ хурдан буян Хэнтий аймгийн адуу бөгөөд соёолон цагаас хурдалсаар эзнээ Алдарт уяач болгосон билээ.
Айргийн гуравт Архангай аймгийн Төвшрүүлэх сумын уугуул, МУ-ын Алдарт уяач Өлзийхутагийн Пүрэвбаатарын Загал морь хурдаллаа. АХ-ын 93 жилийн ой үндэсний их баяр наадамд айрагдсан цагаас морь сонирхогчдын эчнээ танил болсон энэ хурдан эзнийхээ Алдарт уяач цолыг ийнхүү Их хурдын айргаар мялаалаа.
Айргийн дөрөвт  Төв аймгийн Эрдэнэсант сумын уугуул, мэргэжлийн сумогийн Их аварга, МУ-ын Хөдөлмөрийн баатар Мөнхбатын Даваажаргалын сартай зээрд хурдалсан. Зээрд морь АХ-ын 95 жилийн ой үндэсний их баяр наадамд айргийн гуравт хурдлан давхар уяагаар морины их олимпод айрагдаад буй нь энэ юм.
Айргийн тавд Өвөрхангай аймгийн Есөнзүйл сумын уугуул, ММСУХ-ны Ерөнхий нарийн бичгийн дарга П.Сэргэлэнгийн хээр хурдаллаа. Өнгөрсөн жил соёолондоо төрийнхөө наадамд айргийн гуравт хурдалж байсан энэ хурдан хүлгийн уяа сойлгыг  Өвөрхангай аймгийн Хайрхандулаан сумын уугуул, МУ-ын Манлай уяач Б.Отгоннасан тааруулдаг билээ.
Хараахан айрагдаж чадаагүй ч энэ цагийн эрхгүй хурдан хүлгүүдийн нэг гэдгээ дахин нотолсон  буян бол Говь-Алтай аймгийн Баян-Уул сумын уугуул, Тод манлай уяач П.Цэрэнжигмэдийн  хамар цагаан халтар юм. Өнгөрсөн жил төрийнхөө наадамд айрагдан, давхар уяагаар хангайн бүсийн уралдаанд айргийн тавд хурдалсан энэ хурдан хүлэг хэдхэн хоногийн дараа болох баруун бүсийн наадамд тоосоо өргөхөөр зэхэж байна.
А.Мягмарсүрэн