Залуу уяач Л.Мөнх-Эрдэнэ: Шүдлэн үрээ түрүүлгэж, анхны айргаа амсаж байлаа

Дорнод аймгийн Чойбалсан сумын харьяат, залуу уяач Л.Мөнх-Эрдэнэтэй хийсэн ярилцлагыг уншигч танаа хүргэж байна.
-Морь уяад удаагүй гэлээ. Өнөр бүлийн гишүүн болсон нь хэзээ  вэ?
-Зургаан жилийн өмнөөс морь уяж байгаа. Би уг нь Хөвсгөл аймгийн Цагаан-Үүр сумын хүн. Аав ээж хоёр маань Дорнодод илгээлтээр ирж  суурьшаад эндэхийн хүмүүс болсон. Эцэг эх маань морь малтай ойр байгаагүй ч энэ нутгийн аймгийн Алдарт уяач “Тампуу” хэмээх Мягмар гэж уяач хүнийг дагаж уяаны эрдийн дөртэй болсон.
-Анхны айраг түрүү ихээхэн урам нэмдэг. Таны хувьд айраг амссан анхны наадам хэдэн оных байсан бэ?
-2008 онд Гурванзагал сумын наадамд шүдлэн үрээ түрүүлгэж, анхны айргаа амсаж байлаа. Анхны түрүүгээ тэндээс авч байсан болоод ч тэрүү би Гурванзагал сумын наадамд очих дуртай. Бас нутаг ойр. Тэр жил би Мягмар гуайн адууны угшилтай харлаг азарга бас айрагдуулсан.Тэрний дараа жил нэг даага түрүүлгэж, шүдлэн үрээ айрагдуулаад, Чойбалсан сумын сургуулийн ойн наадамд бор даагаа бас дахин түрүүлгэсэн. Бор даага маань тэр жилээ их хурдан байж Дашбалбар, Чулуунхороот сумдын наадамд бас айрагдсан.
-Гурванзагал сумын наадам хэр өтгөн болдог вэ?
-Бага насанд бол өтгөн мордоноо. Дээд насанд  арай цөөн 30-40 адуу морддог байх.
-Шинэ залуу уячид адууныхаа чанарыг сайжруулах асуудал тулгарч байгаа байх?
-Тэгэлгүй яахав. Би Сүхбаатар аймгийн Сүхбаатар сумын харъяат Монхор гээд хөгшний хүүгээс
хоёр үрээ авчирч азарга тавьсан. Тэдний маань төлүүд гайгүй сайхан давхиж байна.
-Бахдалтай наадмын дурсамжаасаа хуваалцаач гэвэл?
-Дашбалбар сумын наадамд бор даагаа айрагдуулсан маань л байх даа. Буриад зон олны наадмыг сонирхож зорьж очоод 120 гаруй дааганаас миний бор үрээ айрагдсанд баяртай байдаг. Буриадууд их соёлтой ажилч хүмүүс байдаг юм билээ.
-Ийм бахдалт наадам олон байна гэдэгт итгэлтэй байна. Морь уях төрийн их хэрэгт тань амжилт хүсье.
"Тод магнай" сэтгүүл Дорнод аймгийн тусгай дугаар