Уралдаанч Д.Шинэбаяр: Том болсон ч ажлынхаа хажуугаар морь уяна

А.Тэлмэн
2017 оны 4-р сарын 24 -нд

Увс аймгийн Өмнөговь сумын уралдаанч Даваанямын Шинэбаяр хүүгийн яриаг уншигч танаа хүргэж байна.
-Хэзээнээс хурдан морь унаж байгаа вэ? Өнгөрсөн хугацаанд ямар амжилт үзүүлсэн бэ?
-Долоон настайгаасаа эхлээд ахыгаа дагаж хурдан морь унаж сурсан. Анх хээр азаргаа хаврын бооцоот уралдаанд таваар давхиулаад, түүний дараа халтар морио түрүүлгэж байсан. Харамсалтай нь халтар морийг маань хулгай авчихсанаас болоод нэг хэсэг амжилт гаргаж чадаагүй ээ. Тэгж байгаад ноднин Баянголын өдөрлөгт хээр үрээ 15-д давхиж цулбуурт баригдаад дараа нь Улиастай багийн өдөрлөгт 20-оор давхисан. Бас сумынхаа 90 жилийн ойд халтар үрээ 35-д давхиулсан. Ер нь сүүлийн үед морио цулбууртай л давхиулж байгаа.
-Хамгийн олон жил унасан нь ямар морь вэ?
-Хээр дөнөн, хээр азарга хоёр. Би дөнөн мориндоо хайртай. Энэ хоёр хоёулаа гараандаа сайн.
Ер нь би морийг “нисгэх” дуртай.
-Давхих дуртай гэсэн үг юм уу?
-Тиймээ. Энгийн үед ч тэр морио нисгэх дуртай. Гэхдээ манайх зундаа хөдөө гараад, намар нь малаа айлд тавьчихаад сумын төв рүү орчихдог юм.
-Хаана зусдаг юм бэ?
-Тэр хөх уулын цаашаа Баруун шилд. Тэгээд мал хариулахаас гадна морь үсэргэнэ, барина, гүйлгэнэ.
-Түрүүн дөнөн мориндоо хайртай гэсэн. Ер нь бэлэгний адуу бий юу?
-Үгүй. Харин хонь мал өгдөг. Хориод хоньтой болсон.
-Сумдын наадмаас гадна холдоо хаана очиж наадаж байв? Танайхан Ховд, Баян-Өлгий рүү гарч нааддаг юм байна?
-Тийшээ дандаа манай ах нар явдаг юмаа. Намайг бага гээд явуулдаггүй юм.
-“А” үнэлгээтэй сурагч медальтай гэсэн. Хэддүгээр ангид сурдаг  вэ? Ямар хүүхэд ийм медаль авдаг юм бэ?
-Бүх хичээл дээрээ А, В гарсан хүүхдүүд авдаг юм. Стандартын бэлтгэл сайн хийгээд олимпиадандаа сайн орсон хүүхэд авна ш дээ. Би долдугаар ангид сурдаг. Тэр медалийг дөрөвдүгээр ангидаа, тэмдгийг нь ноднин авсан. Охиндоо багшийн нэрэмжит математикийн стандарт олимпиад манай энд болдог. Тэр олимпиадаас мөнгөн медаль энэ жил авсан.
-Тоонд сайн байх нь ээ?
-Ангидаа толгой цохьдог. Би багш болъё гэж боддог. Гэхдээ ажлынхаа хажуугаар морь уяад явна. Мориноос салахгүй.
"Тод магнай" сэтгүүл Увс аймгийн тусай дугаар

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна