“Тод магнай”-н Түмэн тайлангаа тавина

Монголын төрт ёсны их цэнгэл эрийн гурван наадмын мөн чанар, үнэ цэнэ, ёс жаягийг харуулсан “Гарьд магнай”, ”Тод магнай”, “Цэц магнай” кинонуудыг үзээгүй хүн байхгүй бизээ. Хэд дахин үзээд ч уйддаггүй энэхүү гайхамшигт бүтээлүүдийн нэг “Тод магнай” киноны Түмэнгийн дүрээр танигдсан СТА жүжигчин Мягмарын Дорждагва урлагт зүтгэсэн 20 жилийнхээ тайланг тавьж, үзэгч олонтойгоо уулзахаар тов гаргажээ. Армийн театрын анхны  жүжигчдийн нэг тэрээр Б.Баатар, Б.Мөнхдорж нарын мундаг найруулагчдад шүүсээ шахуулсаны ачаар өдий зэрэгтэй яваа хэмээн ярьдаг. Сүүлийн жилүүдэд залуу уран бүтээлчдэдтэй ганзага нийлэн дэлгэцийн нэлээд олон бүтээлд дүрээ мөнхөлсөн тэрээр ирэх  сарын 6-ны 19 цагаас бөхийн өргөөнөө үзэгч түмэнтэйгээ уулзахаар болзжээ.
Хад чулуу шиг хатуу сэтгэлтнийг ч
Халуун нулимсаар нь зуурч номхруулдаг
Их урлагийн эс, эргэлдэн урсах цус нь
Элэгнээс нь уягдсан цөс нь юм би 
Хэмээн өөрийгөө тодорхойлсон  М.Дорждагвын “Тод магнай” уран бүтээлийн өргөл хүндэтгэлд  Ардын Жүжигчин  П.Цэрэндагва, Д.Мэндбаяр, Гавьяат Жүжигчин Ш.Дэлгэржаргал, Г.Равдан, А.Чаминчулуун болон дуучин МУГЖ Н.Төмөрхуяг, Ц.Түвшинтөгс, СТА Б.Нармандах, Т.Дэлгэрмөрөн, А.Хосбаяр, П.Баярцэнгэл, “Гайс666”, “Пароди”, “Войс”, “Хилчин”, “Мотив” зэрэг хамтлагууд оролцох аж.  Эрхэм уншигч хурдан морь сонирхогч та бүхэн ч гэсэн “Тод магнай” уран бүтээлийн цэнгүүнд хүрэлцэн ирээрэй.

Б.Эрдэнэсүрэн