Эрдэнэсант сумын МСУХ-ны тэргүүн Н.Мөнхзориг: Сайн уяач, сайн морь нийлж байж л амжилт гаргадаг юм байна

- Төрийнхөө наадамд их морь айрагдуулсан танд баяр хүргэе. Баярынхаа сэтгэгдлээс хуваалцаач?
-Төрийнхөө наадамд анх удаа морь мордуулаад айрагдуулсандаа маш их баяртай байна. Миний хувьд сүүлийн зургаан жил хурдан морь уяж байгаа харьцангуй залуу уяач. Өнгөрсөн хугацаанд сум орон нутагтаа битүү голцуу адуугаар наадаж айраг түрүү алдалгүй хүртэж байсан. Одоогийн байдлаар аймгийн бүсийн уралдаанаас гурван айраг, сумын баяр наадмаас 10 гаруй айраг, түрүү хүртээд байна.
- Мөн сумынхаа МСУХ-ны тэргүүнээр ажилладгийг тань мэдэх юм байна. Энэ албыг хашаад удаж байна уу?
-Эрдэнэсант сумынхаа МСУХ-ны тэргүүний албыг аваад гурван жил болж байна. Хэдийгээр нутаг ойр ч манай сумынхан тэр болгон улсын наадмыг зорьж ирж уралдахгүй байгаа. Энэ жил гэхэд гурав дөрвөн л уяач ирж төрийнхөө наадамд морь мордуулсан. Хул морины амжилт манай сумын уяачдад итгэл урам зориг бэлэглэж, дараа дараагийн жилүүдэд илүү олноороо ирж оролцох байх хэмээн бодож байна.
- Эргэлзэхгүй байна. Хул морь наадмын өмнөх сунгаануудад хэр байсан бэ?
-Сунгаануудад түрүү, аман хүзүүнд л давхиад байсан. Тийм болохоор нь уяачтайгаа ярьж байгаад улсын наадмыг зорьж ирсэн юм. Миний хул морины уяа сойлгыг нийслэлийн Алдарт уяач Г.Бат-Эрдэнэ тааруулдаг. Сайн уяач, сайн морь нийлж байж л амжилт гаргадаг юм байна гэдгийг ойлголоо. 
- Хул морио айрагдана чинээ санаж байв уу?
-Нутгийн буурлууд, морины зүтгэлтнүүд гээд олон хүн “чиний хул морь улсад айрагданаа” гэж хэлж байсан. Тэр олон хүмүүсийн сайхан үг биеллээ олж морь маань айрагдлаа. Миний хувьд уралдаан үзэж байгаад 10 хэдээр ороод ирэхээр нь “за айрагдах нь тодорхой боллоо” гээд хөлсний хашаа руу гүйсэн. Яагаад гэхээр миний хул морь суудаггүй адуу байгаа юм.
- Төрийн наадамд  их морь айрагдуулах тэр мэдрэмжээсээ хуваалцаач?
-Тэрэн шиг сайхан мэдрэмж байхгүй дээ. Одоо ч догдолсон хэвээр л байна. 
- Энэ том баяраа хамгийн түрүүнд хэнтэй хуваалцсан бэ?
-Хамгийн түрүүнд хул мориныхоо эзэнтэй хуваалцсан.Морь хурдан байхаар нь би дуудуулаад  ирүүлчихсэн байсан юм.
- Ингэхэд танайхан хурдан хүлгийн уяа сойлго тааруулж байв уу?
-Монголчууд бидний өвөг дээдэс цөм л морь мал уяж байсан шүү дээ. Манай аав адуучин хүн. Гэхдээ морь уяж байгаагүй. Харин одоо дүү маань морь уяж эхэлж байна.
- Залуу уяачийн дараа дараагийн уралдаануудад амжилт хүсье. Ярилцсанд баярлалаа.

А.Тэлмэн