Уяач С.Бямбасайхан: Эрлийз адууг ялгаснаар монгол морьдод давуу боломж олгож чадлаа

- Төрийн их наадамдаа соёолон гуравлуулсан танд уншигчдынхаа өмнөөс халуун баяр хүргэе?
-Баярлалаа. Би төрийн наадамдаа дөрөв дэх жилдээ морьдоо мордуулж байна. Улсын баяр наадамд айрагдсан халиун үрээ маань Сүхбаатар аймгийн Түмэнцогт сумын Саарийсүрэнгийн Төмөр-Очир гэдэг хүний унаган адуу байгаа юм. Энэ жилийн хувьд үүлдэрлэг чанараар нь эрлийз адууг ялгасан нь монгол адууныхаа хурд хүчийг бодитоор сорих боломж олголоо хэмээн бодож сууна.
- Өмнөх жилүүдэд мордуулсан морьд нь ямар амжилт үзүүлж байв?
-Ихэнхдээ 30, 40-н хэдээр л давхиж байлаа. Би Говь-Алтай аймгийн Дарив сумын уугуул хүн. Гиннесийн номд Монгол адууг бүртгүүлэхээр 4000 гаруй морь уралдуулахад Говь-Алтайд миний морь бас 30-н хэдээр давхиж байлаа.
- Хаанахын угшилтай адуу байсан юм?
-Төв аймгийн Сэргэлэн сумын харьяат манай ахын унаган адуу.
- Та хэдий үеэс морины уяа эвлүүлж эхэлсэн бэ. Анхны айраг, түрүүгээ хэзээ хүртэж байв?
-Морины уяа эвлүүлээд долоо, найман жил болж байна. Анх Төв аймгийн Заамар суманд болсон баруун бүсийн наадамд соёолон хонгор үрээ түрүүлж байлаа. Бас л Сүхбаатар аймгийн Түмэнцогт сумын Төмөр-Очир гуайн адууны угшилтай үрээ байсан юм.
- Хэдэн насны морьд мордуулсан бэ?
-Ганц л морьтой ирсэн юм. Харин Дундговь аймагт болж байгаа Говийн бүсийн уралдаанд гурван морь мордуулсан. 10, 20-доор л давхилаа.
- Танай удамд танаас өөр морь уядаг хүн бий юү?
-Манай аавын дүү нийслэлийн Алдарт уяач Дүйхэржав гэдэг хүн бий.
- Даривынхаа ойд морьд мордуулсан уу?
-Мордуулалгүй яахав. Дүйхэржав ах маань аваад явсан.

А.Тэлмэн