Аймгийн Алдарт уяач Б.Баярдорж: Төрийнхөө баяр наадамд хоёр дахь удаагаа шүдлэн насны морь айраглдуулсандаа баяртай байна

-Ардын хувьсгалын 96 жилийн ойн баяр цэнгэл наадамдаа хэдэн насны морьд мордуулж, ямар амжилт үзүүлэв?
-Би энэ жил улсын баяр наадамд мордуулахаар нэг соёолон, хоёр шүдлэн уясан. Тэднээс маань ганц хээр шүдлэн мордож, аман хүзүүдлээ.
 -Төвийн бүсийн уралдаанд мөн амжилттай уралдсан гэж сонсогдсон?
-Тиймээ, Төвийн бүсийн уралдаанд соёолон, шүдлэн хоёр айргийн гуравт хурдаллаа. Мөн улсын баяр наадамд айрагдсан хээр шүдлэн маань Өвөрхангайд түрүүллээ. 
-Ингээд та энэ жилийн хувьд улсын баяр наадам болон Засгийн газрын тогтоолтой уралдаанаас нийт хэдэн айраг, түрүү хүртэж байна вэ?
-Гурван адуу мордуулаад нэг түрүү, нэг аман хүзүү, хоёр айраг хүртлээ. Үүнээс өмнө 2015 онд улсын наадамд шүдлэн, Булган аймгийн бүсийн уралдаанд хязаалан айрагдуулсан.
-Төвийн бүсийн уралдаанд айрагдсан соёолон тань хаанахын ямар угшилтай адуу вэ?
-Эх нь Баянчандманийн манай найз Төрөөгийн унаган адуу. 
-Нөгөө шүдлэн нь зээрд зүстэй адуу билүү?
-Тиймээ, зээрд үрээ байгаа. 
-Хаанахын ямар угшилтай билээ?
-Миний унаган адуу. Төв аймгийн Жаргалант угшилтай.  Даагандаа Эрдэнэтийн бүсийн уралдаанд 10-н хэдээр орж байсан. 
-Энэ жил улсын баяр наадмаас өмнө уралдсан уу?
-Овооны наадамд түрүүлж, Төвийн бүсийн уралдаанд айрагдсан. 
-Баяр наадмын зохион байгуулалт сэтгэлд тань хүрэв үү?
-Улсын баяр наадмын тухайд зохион байгуулалт сайхан боллоо.

-Та улсын баяр наадамд хэд дэх жилдээ морь мордуулж байна вэ?
-Анх 2013 онд даага мордуулж, 50-иадаар давхиулж байлаа. Eрөнхийдөө 2015 оноос илүүтэй адуундаа анхаарч, өсгөж үржүүлэн, адууны төлөө зүтгэж өнөөдөр үр шимийг хүртэж эхэлж явна. Уяач сайхан найз нөхөдтэй ч боллоо. Батцоож, Баяраа, Мөнгөншагай бид хэд чинь дунд сургуулийн дээд, доод ангид сурцгааж байсан нэгэн хүүхдүүд л дээ. Нэг сургуулийн нэгэн үеийн залуучууд дундаас уяачид олноороо төрөн гарсан нь билэг дэмбэрэлтэй сайхан санагддаг.
-Аав тань Хүйн долоон худагт буюу одоо морь уралдаж байгаа газарт олон жил адуу малласан гэж сонссон. Аавын тань тэр сайхан адуунууд танд өвлөгдөж ирсэн биз дээ?
-Тэгэлгүй яахав. Дээрээс нь хүнээс авсан азарга, гүүнүүд холилдоод, барилдлага зохилдлого нь таараад, сайхан хүлгүүд гарч байна. Миний хувьд улс, бүсийн уралдаануудад айраг түрүүнд хурдалсан хүлгүүдийн удам угшилтай адууг газар, газраас цуглуулж, аавынхаа адууны цусыг сэлбэсэн.
Тухайлбал, морин тойруулга, Сүхбаатар, Хэнтий гээд л газар газрын сайн угшилтай адуу нэлээд цуглууллаа.
-Аймгийн Алдарт уяач цолыг хэдэн онд хүртсэн бэ?
-Уржнан жил Завхан аймгаас аймгийн Алдарт уяач цол хүртсэн.
-Завхан нутагтаа очиж наадаж байв уу?
-Үгүй ээ. Тэгэхдээ очиж уралдана гэсэн бодолтой явдаг. Хэдийгээр би Завханд төрж өсөөгүй боловч аав, ээжийнхээ нутгийн уул усанд залбирч, сүсэглэж л явдаг юм.
-Хамгийн сайхан дурсамж үлдээсэн наадмын талаарх дурсамжаар ярилцлагаа өндөрлөе?
-Энэ жилийн наадам хамгийн сайхан дурсамж үлдээлээ. Цаашид ийм сайхан дурсамж үлдээсэн наадмууд олон байх байхаа. Ингээд нийт наадамчин уяачид, уралдаанч хүүхдүүддээ эрүүл энх, аз жаргал энэ хорвоогийн хамгийн сайн сайхан бүхнийг хүссэн ерөөе.   
-Одтой сайхан наадаж буй танд дахин баяр хүргэж, амжилт хүсье. Ярилцсанд баярлалаа
"Тод магнай" сэтгүүл 88, 89