МАНЛАЙ СУМЫН ЦУУТАЙ УЯАЧИД

Түшээт хан аймгийн Эетэй бээлийн хошуу ноён Жагваралын Содномдорж:
Ж.Содномдорж нь 1882-1907 онд Эетэй бээлийн хошууг захирч байжээ. Тэрбээр олон удаагийн даншиг болон төрийн их баяр наадамд хурдан хүлгийнхээ тоосыг өргөж нэр алдраа мандуулж явсан, говь нутагтаа алдартай сайн уяач байсан юм. Түүний хамар цагаан зээрд азарга нь улсын баяр наадамд нэг түрүүлж, нэг удаа дөрвөөр давхиж байсан бол 1923 оны улсын баяр наадамд бор морь нь аман хүзүүдэж, хүрэн шүдлэн нь айргийн дөрвөөр давхиж байсан түүхтэй.
Мөн 1925 оны үхэр жил Ардын хувьсгалын дөрвөн жилийн ойн наадамд Богдхан уулын аймгийн Хоёр Өлзийт уулын хошууны Жагваралын Содномдоржийн зээрд азарга айргийн гуравт хурдалсныг түүхийн шарласан хуудаснаас харж болно. Энэхүү хамар цагаан халзан азарга  1928 оны улсын баяр наадамд түрүүлэн түмэн олноо баясгаж “Со сайдын зээрд халзан” хэмээн алдаршсан билээ. 
Түшээт хан аймгийн Эетэй бээлийн хошуу ноён Содномдоржийн Галсандаржаа:
1907-1923 онд нь Эетэй бэйлийн хошууг үе залгамжлан захирсан С.Галсандаржаа нь эцгийнхээ хурдан морь уяж, шинждэг арвин их туршлагыг өвлөсний зэрэгцээ өөрийн ажигч гярхай авьяасандаа тулгуурлан хурдан морь уях эрдэмд суралцан түүнийгээ хөгжүүлж чадсан нэгэн байсан гэдэг.
Тэрбээр Хардэл бээсийн хошууны хурдан морьт Пунцагнамжилын хүү Пүрэвдоржтой Гандан хийдэд хамт шавилан сууж байхдаа ойр дотно үерхэн нөхөрлөж байсан тул 1928 онд Хардэл бээсийн хошууг зорьж очин хурдан удмын гурван үрээ нутагтаа авч ирэн, хошууныхаа адууны удам, угшлыг сайжруулж байсан тухай түүхэн сурвалжуудад тэмдэглэн үлдээжээ. Түүнчлэн Галсандаржаа ноёнтон эмгэг согог олсон адууг үзэж оношлох, хатгаж ханах зэргээр эмчлэн эдгээхдээ гаргууд нэгэн байсан тухай нутгийн олны ам дамжсан яриа байдаг.
Дашрамд сонирхуулахад, тэрбээр наадамд явахдаа хурдан морьдоо шон тойруулах зуураа хуурч залан морины явдал гийнгоо татуулах, “Хурдан сайхан” дууг хуурдуулдаг заншилтай байсан гэдэг.
"Тод магнай" сэтгүүл. Дугаар 90