МАНЛАЙ УЯАЧ Д.ДАГВАДОРЖ: ОЛОНХ НЬ САЙХАН НААДСАН БОЛ НААДАМ САЙХАН БОЛЛОО ГЭСЭН ҮГ

-Энэ жилийн баяр наадмын сэтгэгдлээсээ хуваалцахгүй юу. Таны хүсэн хүлээж байсан наадам болж чадав уу?
-Монгол хүн амны бэлгээр гэдэг. Наадам сайхан боллоо. 
-Монгол адуугаараа уралдана гэсэн хүлээлт талаар болсон байх л даа?
-Зохион байгуулж байгаа комиссынхоо шийдвэрийг биелүүлж чадсангүй шүү дээ. Гэхдээ олон нийтээрээ сайхан наадлаа. Ганц бид нар наадаж байгаа биш, олонх нь сайхан наадсан бол наадам сайхан боллоо гэсэн үг. 
-Манлай хэдэн насны хичнээн морь уяж, төрийнхөө наадамд мордуулсан бэ?
-Зургаан насны 30-аад морь уясан. Их морь зургааг уяснаас Ембүү хар зургаагаар, бусад нь 20-30-ын хооронд давхилаа. 
-Ембүү хар морь наадмын өмнөх сунгаануудад хэр хурдан байсан бэ?
-Гайгүй сайн байсан шүү. Сунгаануудад өнгөлөөд л байсан болохоор улсын наадамд айрагдана л гэж бодож байлаа. 
-Айргийн таваас урагш морьдтой сунгаанд давхиж байсан уу?
-Алинтай нь ч уралдаагүй ээ, өөр газар сунгаж байсан.
-Хар морь хэдтэй вэ?
-Энэ жил наймтай морь.
-Хаанахын ямар угшилтай адуу вэ?
-Сүхбаатар аймгийн Асгат сумын адуу. Бүдүүн Баяраа гэж залуугаас намар авсан. Бага наснаасаа давхисан морь юм билээ. Ноднин Сүхбаатар аймагт болсон Зүүн бүсэд гурваар давхисан. Өвөл Дүнжингараваар уялгүй улсын наадам, Завханы бүсэд уралдуулна гэсэн тооцоо байсан. Гэвч Завханд бүсийн уралдаан болсонгүй, тэгээд Сүхбаатарын зүүн бүсэд явсан. 
-Зүүн бүсэд яаж наадсан бэ?
-Оонон халиун морь зургаалж, Ембүү хар  долоо, шарга халзан морь 11-ээр давхисан. Халиун, шарга халзан хоёр миний унаган адуу байгаа юм.  
-Ярилцсанд баярлалаа.

"Тод магнай" сэтгүүл. Дугаар 99. 2018 он