Армиас төрсөн анхны Тод манлай уяач –Цэрэндоржийн Аюуш

Армиар овоглосон цөөхөн уяачдын нэг хошууч Цэрэндоржийн Аюуш 1956 онд Архангай аймгийн Хотонт сумын нутаг Өндөр сант хэмээх газар есөн хүүхэдтэй айлын дундах хүү болон мэндэлжээ.Сумандаа дунд боловсрол эзэмшсэн тэрээр цэргийн сургууль төгсч ирээд 314-р ангийн албан хаагчаар ажиллах болж. 

Багадаа үнээ ивэлгэх ажлаас зугатаан хурдан морь унах болсон тэрээр том ах Цэнд-Аюушийнхаа уясан  морьдыг унаж, сумынхаа наадмаас хэд хэдэн түрүү, айраг хүртэн шаггүй уралдаанч гэгдэх болжээ. Харин морь уях тухайд 1970-аад оноос эхэлж, 1983 оноос төрийн наадамд оролцох болсон байна.

Төрийн зарлигт наадмын анхны айргаа 1992 онд хээр морио аман хүзүүнд хурдлуулан хүртсэн бөгөөд 2004 онд улс, бүсийн уралдаанаас  зургаан түрүү, 58 айраг хүртсэн амжилтаар Монгол Улсын Тод манлай уяач цолны №4 үнэмлэхийг гардан авсан юм.

Хээр адуугаар бахтай наадагч Ц.Аюуш  өөрийн мэдсэн сурсанаа бусдад харамгүй хуваалцдаг байсан агаад түүний шавь нараас Бааст, Монхор нар Манлай, Адьяабазар, Алтангадас нар улсын Алдарт уяач цолыг хүртсэн юм.  

Тэрээр: “Бага адуунд гаргасан алдааг засч болдог учраас би уях дуртай. Шүдлэндээ сайн давхисан адуу нас ахиад хурдлаад байх шиг санагддаг. Гэхдээ миний ажигласнаар хэт цуцааж, зүрхийг нь үхүүлж болохгүй. Хамгийн гол нь хөндүүрийг нь зөв авах ёстой” хэмээн сургадаг байжээ.

Б.Хастөр