Үүлдэрлэг байдлыг тогтоох ажлын хэсгийн нарийн бичгийн дарга Н.Бямбадорж: Гурван шатлалаар хяналт тавьж байгаа

Хүнс Хөдөө Аж Ахуйн Яамны Мал аж ахуй бодлого хэрэгжилт зохицуулалтын газрын мэргэжилтэн үүлдэрлэг байдлыг тогтоох ажлын хэсгийн нарийн бичгийн дарга Найдангийн Бямбадоржоос тодруулга авлаа.

-АХ-ын 98 жилийн ойн баяр наадмын хурдан хязаалангийн уралдааны үүлдэрлэг байдлыг тогтоосон талаараа мэдээлэл өгөөч.

-Бид үүлдэрлэг байдлыг 2015 оны журмын дагуу гурван шатлалаар тогтоосон. Үүнд шүдлэх, үүлдэрлэг байдалд нь хяналт тавих, сэрвээний өндрийг хэмжих. Эхний хоёр шатны хяналтанд тэнцээгүй бол нурууны өндрийг шалгалгүй хасч байгаа.

-Хэмжилт хийлгүй хувь хүний үзэмжээр хандлаа гэсэн гомдол их гарч байна.

-Үүлдэрлэг байдлаар тэнцээгүй адууг бол сэрвээний өндрөөр хэмжих шаардлагагүй гэж үзсэн. Үүлдэрлэг байдлаар тэнцэхгүй гэчихээд сэрвээний өндрөөр тэнцэх нь үү, үгүй юу гэж үзэх нь учир дутагдалтай.

-Үүлдэрлэг байдлыг тогтоохдоо ямар шинж байдлыг харгалзаж байгаа вэ?

-Монгол морьдоос эрлийз морьдыг ялгах журам гэж бий. Тэр журмын дагуу толгой, дэл сүүл, хөлийн шилбэ, хүзүүний суулт, чих зэргийг харгалзаж байгаа.

-Үүлдэрлэг байдал тогтоох комисст ажилласан хүмүүс мэргэжлийн мэргэшсэн байж чадах уу?

-Хүнс хөдөө аж ахуй хөнгөн үйлдвэрийн сайдын тушаалаар Монголын үндэсний морин уралдааны салбар хорооны тогтоолоор байгуулагдсан ажлын хэсэгт ажиллаж байгаа хүмүүс бол бүгд мэргэжлийн мал зүйчид.

-Үүлдэрлэг байдлаар хэдэн үрээ хасагдсан бэ?

-84 үрээ хасагдсан байгаа.

-Бүртгэлээс харахад түүнээс илүү олон хасагдсан болж таараад байна.

-Тавиач хүүхдүүд ороод тэр байх. Шүдээр дөрвөн үрээ хасагдсан. Үүлдэрлэг байдлаар 80 нийтдээ 84 үрээ хасагдсан. Бусад нь тавиач хүүхдүүд байсан байх. Яагаад тавиачдыг уралдааны замд гаргахгүй байгаа вэ гэхээр уралдааны замд будилуулах, бусдыгаа ташуураар ороолгох зэрэг асуудал гаргадаг.

-Жавхлант шаргын хурдад айрагдсан үрээг  хэмжилгүй хасчихлаа гэсэн гомдол гаргасан уяачтай таарсан. Монгол адуу хэлмэгдсэн юм биш биз.

-Бид “Жавхлант шаргын хурд”-д ямар адуу түрүүлж, айрагдсаныг мэдэхгүй. Тухайн морины өмнө нь гаргасан амжилт, уралдаанчийн номер нь, тамга, эзэн уяач зэргийг үл харгалзан журмын дагуу ажиллаж байгаа.

-Эргэлзээтэй адуунд үүлдэрлэг байдлыг урьдчилан тогтоолгож болно гэж байсан. Уралдаанаас өмнө хэдэн адуу үүлдэрлэг байдалдаа хяналт тавиулсан бэ?

-Өмнө нь тогтоолгосон адуу байхгүй.

Д.Солонго