Уралдаанч Б.Болдбаяр: Авга ахыгаа дагаж, морь унаж сурсан

Сэтгүүлч
10-р сарын 04 -нд

Үндэсний их баяр наадам, Их Монгол улс байгуулсаны 813 жилийн ой, Ардын хувьсгалын 98 жилийн ойн баяр наадмын хурдан морины уралдаанд унасан хүлгээ айргийн гурваар хурдлуулсан /2019.07.10/ бяцхан уралдаанчийн баярын сэтгэгдлээс хуваалцсан юм.

Түүнийг Борын Болдбаяр гэх бөгөөд Баянхонгор аймгийн Бууцагаан сумын уугуул, аймгийн Алдарт уяач Нямын Баттөмөрийн хүрэн хязааланг унаж, ийнхүү айргийн тавд багтсан юм. Уралдаанч хүү энэ долдугаар сард 10 насыг хүрч байгаа бөгөөд Сэлэнгэ аймгийн Сант сумын дунд сургуулийн дөрөвдүгээр ангид орох гэнэ. Харин хурдан морь унаад гурав дахь жилдээ орж яваа гэж байгаа юм. Энэ хугацаанд сум, аймагтаа илүүтэй наадаж ирсэнээс өнгөрсөн жилийн төвийн бүсэд Сэлэнгэ аймгийн Сант сумын залуу уяач н.Отгонбаярын /Болдбаярын авга ах/ саарал шүдлэнтэй долоогоор давхижээ. 

Үүнээс өмнө энэхүү саарал шүдлэнг дааганд нь Сэлэнгэ аймгийн Хушаатын 40 жилээр түрүүлгэсэн. Харин аймгийнхаа Жавхлант сумын 30 жилийн ойгоор эрлийз бага насанд айргийн тавд давхиулж байсан амжилтын эзэн юм. Үүн дээр сумдын наадмын 10 гаруй айраг, түрүү нэмэгдэх юм билээ. Тэгвэл улсын наадамд анх удаа уралдаж, уралдаанчийн амжилтаа төрийн наадмын айргаар нэмсэнд гэр бүлийнхэн нь ч тун баяртай байгаа гэнэ. Тэд хүүгийнхээ уралдааныг зурагтаар үзсэн тухайгаа сонирхуулж байлаа. Учир нь Болдбаяр хүүгийн баяр наадмын сэтгэгдлийг хуваалцахад олныг ярих боломж олдоогүй тул эргэн холбогдож болох утасны дугаарыг нь асуусан юм. Тэр үед  “Эмээ маань намайг хамгийн сайн мэдэх хүн дээ” гээд дугаарыг нь өгсөн. Ингээд баяр наадмын дараа хүүгийн эмээтэй холбогдоход ахын нь хамтаар “Өнөөдөр 61-ийн сунгаан дээр ирж хүүгээ хараад сууж байна. Хүү маань Баянхонгорын даншигт наадах юм. Одоогоор баяр наадмын сонин сайхныг нь хуваалцаж амжаагүй л сууна. Сунгаа нь дуусахаар сайхан яриулна даа” хэмээн сэтгэл догдлонгуй ярих аж.

Ингээд бяцхан уралдаанчийн дараагийн уралдаанд амжилт хүсье.

П.Ундраа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна