Уралдаанч О.Баяржавхлан: Наадмын сүүлийн өдөр амжиж амжилт гаргалаа

Сэтгүүлч
2019 оны 10-р сарын 21 -нд

...Ширээ талдаа шандас сорихдоо

Шинжээч уяачдын эрдэмд хувилаад

Бяцхан эздийнхээ бодлыг гүйцээж

Барианы газраас тодрон ирэн

Хүлгийн удамт хөөрхөн дааганууд минь

Хүүхэд бидний дотны нөхөр дөө...

Хүүхэд нь ч хөөрхөн, хүлэг нь ч өхөөрдөм дааганы уралдааны  түрүү магнайгаар аймгийн Алдарт уяач Г.Чинзоригийн халтар даага тодорсон юм. Уг даагыг 545 дугаарын уралдаанч Одончимэгийн Баяржавхлан унаж хурдлуулсан. Түүнтэй Хүйн долоон худгийн цэнхэр хашаанд уулзах боломж таарсангүй. Учир нь Цэнгэлдэхэд хурдан хүлгэдээ цоллуулах гэж яарсан олны хөл Хүйн долоон худгийн амар тайвныг хормын дотор л “эвдэж” орхисон юм. Ингээд Баяржавхланг Ерөнхийлөгчөөс шагналаа гардан авсны дараа ярилцаж амжсанаа энд хүргэж байна.

Хүү гоёлоо өмсчихөж. Шагналын эзэн болсон болохоор баяр хөөр дүүрэн байгаа нь илт. Тэгсэн атлаа яриа авахаар зорин очиход бяцхан ичингүйрэн цөөн үгээр товчхон хариулна. Ингэхдээ хурууны сөрдийсөн арьсыг татах бөгөөд хөөрхөн божин бор гар нь их ажлын ард гарсныг төвөггүй харуулна. Хайр хүргэм хүүхэд нас аа гэж. 

-Миний дүү манай уншигчдад өөрийгөө танилцуулаарай?

-Намайг Одончимэгийн Баяржавхлан гэдэг. 10 настай.

-Энэ наадмаар хэдэн нас унаж уралдав даа?

-Өнөөдөр /2019.07.12/ тав дахь насаа унаж түрүүллээ. Өмнөх наснуудын хувьд зарим нь хасагдаад, хязаалан мордоод 30 хэдээр ороод байсан юм. Наадмын сүүлийн өдөр амжиж амжилт гаргалаа. Сэтгэл өндөр байна.

-Өмнө нь улсын наадамд морь унаж байв уу?  

-Хоёр дахь жилдээ оролцож байна. Түрүү жил айхтар амжилт гаргаагүй ээ. 20 гаргаад л давхиулсан. Эрлийз дааган дээр долоолсон.

-Өөр хаагуур наадаж ямар амжилт гаргасан бэ?

-Дорноговь аймагт Баатархүү ахын шарга халзан даагыг түрүүлгэсэн. Зүүнхараад Даваадалайн их морь унаж түрүүлсэн.  

-Сая морио цоллуулаад, шагналаа авлаа. Ямар санагдаж байх юм?

-Ерөнхийлөгч цүнхтэй бэлэг өгч байна. /сурв.харуулав/ Цэнгэлдэхэд орох сайхан юм. Том болоод уяач болоод уяач ах нар шигээ Цэнгэлдэхэд морио цоллуулна аа.

-Мэдээж морь унах дуртай. Өөр юунд дуртай вэ?

-Би бас барилдах дуртай. Галынхаа хүүхдүүдтэй барилддаг ч заримдаа дийлээд заримдаа унаад л явж байна.

-Ярилцсанд баярлалаа. Дүүгийнхээ дараагийн уралдаануудад амжилт хүсье.

П.Ундраа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна