“Тод магнай”-чууд ойн баяраа тэмдэглэн өнгөрүүлэв

Морьтон монголчуудын мөнхийн омогшлыг дэврээсэн “Тод магнай”-н хамт олон 2019 оны арваннэгдүгээр сарын 16-нд 10 жилийн ойн баяраа тэмдэглэн өнгөрүүллээ. Корпорейт Конвеншн центрт  болсон  баярын арга хэмжээнд Монгол улсын Хөдөлмөрийн баатар Ч.Хурц, СГЗ, түүхийн ухааны доктор сэтгүүлч А.Баярмагнай, МСНЭ-ийн Ерөнхийлөгч Х.Мандахбаяр, Тод манлай уяач Ц.Хэнмэдэх, Г.Сандуйжав, Т.Галбадрах, О.Батбилэг, Б.Мөнхтөр, Б.Жанчив, Б.Бат-Өлзий, Манлай уяач Г.Буянтогтох, МУ-ын Алдарт уяач Ж.Баянжаргал, П.Сэргэлэн, Б.Баасанбазар нарын улсын цолтой уяачид болон 21 аймгийн уяачдын төлөөлөл хүрэлцэн ирсэн байлаа.

Ойн галерей, дурсгалын самбар, ярилцлагын цаг, айрагны ёслолоор угталт эхэлсэн бол  ёслолын арга хэмжээг нээж тус сэтгүүлийн эрхлэгч А.Эрдэнэтуяа бяцхан түүх сөхөөд ““Тод магнай” сэтгүүлтэй 10 жил хамт байж, биднийг цаг үргэлж дэмжиж, урмаар усласаар ирсэн эрхэм уншигчид, эрдэмт уяачдадаа талархсан сэтгэл маань хязгааргүй билээ.  Морьтны өв соёлыг түгээн дэлгэрүүлж, хойч үедээ өвлүүлэн үлдээхэд өөрсдийн хувь нэмрээ оруулахаар тэртээ 10 жилийн өмнө өргөн барьж байсан сэтгүүл маань нэг удаа Монгол Улсын Топ сэтгүүлээр, хоёр удаа ММСУХ-ны Шилдэг хэвлэл мэдээллийн байгууллагаар шалгарч, Морины төв хэвлэл болтлоо өргөжин тэлж, өөрийн орон зайгаа тунхаглан зарлажээ. Энэ бол дан ганц редакцийн хамт олны баяр бус даяар монголчуудын, хүлгийн хиймориор төр түмнээ цэнгүүлэгч уяачид, морины зүтгэлтнүүд та бүхний баяр юм” хэмээн онцолсон юм. 

Харин МСНЭ-ийн Ерөнхийлөгч Х.Мандахбаяр “  “Тод Магнай” хурдан морины төрөлжсөн сэтгүүлийн 10 жилийн ой тохиож байна. 

2004 онд Монгол ёс заншил, өв соёл, уран зохиол, урлаг, түүхийг сурталчлах зорилгоор “Хийморь” сониноо үүсгэн байгуулж байх үед А.Эрдэнэтуяа хэмээх сэргэлэн шар охин сэтгүүлчээр ажилд орж байв. Тэр үед миний бие өөрөө сониныхоо эрхлэгчээр ажилладаг байлаа. Нэг жил гаруйн дараа шиг санаж байна, А.Эрдэнэтуяаг Ерөнхий редактороор томилж, бид таван жилийн хугацаанд Монголын топ таван сонины нэг болтол “Хийморь”-ийг хамтран удирдаж байв. Хожим А.Эрдэнэтуяа “Зиндаа”, “Хийморь” сонины Ерөнхий эрхлэгчээр ажиллаж байгаад 2009 онд өрх тусгаарлан “Тод магнай” сэтгүүлээ эрхэлсэн. “Хийморь” сонинд “Гарьд магнай”, “Тод магнай”, “Цэц магнай” хэмээх гурван тогтмол булан байсны нэг нь ийнхүү сэтгүүл болсон түүхтэй. Төрөлжсөн сэтгүүлийг тогтмол хэвлүүлж, салбартаа хүлээн зөвшөөрөгдөх хэмжээнд нэр хүндтэй, ашигтай ажиллуулж авч явна гэдэг амаргүй даваа. Тод магнайчууд 10 жилд 115 дугаар гаргасан байна. Энэ хамт олны нөр их хөдөлмөрөөр бүтсэн амжилтыг хараад бахархах сэтгэл эрхгүй төрлөө. Алтан гадас одонт, авьяаслаг сэтгүүлч, ажилч хичээнгүй А.Эрдэнэтуяа эрхлэгч болон хамт олонд нь, “Тод магнай”-н нийт уншигчдад халуун баяр хүргэж, 1000 дахь дугаарын баяр дээр нь уулзахын ерөөл өргөе өө” хэмээсэн юм.

Үүний дараа зочид хүндэтгэлийн зоогоо барьж, “Ухаан сийрэг, асуулт хариултын тэмцээн” /Хурдан морины уралдаанд бооцоо тавих/, “Уянгат хоолойт тэмцээн” /Хурдан морины цол хэн сайн дуудах вэ/ зэрэг тэмцээнийг явуулж, ялагчдыг тус  бүр 500,000 төгрөгийн эрхээр урамшуулсан юм. Мөн ирсэн зочдоос азтан шалгаруулж,  нэг сая төгрөгийг бэлэглэсэн гээд дуу хуураас гадна сонирхол татсан олон арга хэмжээ өрнөсөн нь ирсэн зочдод ихэд таалагдав.

“Харанга”-ын хар азарга “Толин хул”-аараа бэлэг барьж, сэтгүүлийн хамт олонд шагналын хур бууснаас энэ өдөр сэтгүүлч П.Ундармаа хэвлэл мэдээллийн тэргүүний ажилтан цол тэмдгээр,  сэтгүүлч У.Энхмаа, Д.Гантулга, гэрэл зурагчин Ч.Ганболд нар ММСУХ-ны “Эрдэнийн очир” одонгоор тус тус энгэрээ мялааллаа.

Энд нэмэхэд “Тод магнай”-н хамт олон өнгөрсөн хугацаанд 115 дугаарын уншигчдын гар дээр хүргэхээс гадна монгол орныхоо 21 аймаг, 300 гаруй сумдаар тойрч, хөдөөгийн хөх уяачид болон тэдний алдарт хурдан хүлгэдийн амжилтын товчооныг архивлан “Todmagnai.mn” сайт болон сэтгүүлээрээ дамжуулан түмэнд түгээжээ.

Даяар монголчууд, хүлгийн хиймориор төр түмнээ цэнгүүлэгч уяачид, морины зүтгэлтнүүд та бүхэндээ “Тод магнай” сэтгүүлийн 10 жилийн ойн баярын мэндийг өргөн дэвшүүлье. Морины цагаан босоо хийморь өнө мөнхөд ивээх болтугай.

П.Ундраа