Тарган моринд нимгэн, эцэнхий моринд зузаан тохом тохож хөлсөл

Сэтгүүлч
2020 оны 3-р сарын 25 -нд

Хөлс авахуй нь: Морийг анх барьсны маргааш үсний угийн хар шавар гэгч хөлсийг гаргах тул сул нүцгэн хүн унаж болохгүй. Чимэг лугаа бүрэн хүүхэд уралдааны эмээл хазаарыг тохож нэгэн үе үл цуцахын  төдий газраас үсэргэж давхиад ер хөлсийг зөөлөн, модон хусуураар үсийг сөргөж ав. Чанга авбал хайлмал тос нь хөлд бууж гэмтэх. Түүнээс гуравдугаар хоногт үдээс урьд лаг шавар хөлсийг авах тул битүү цэвэр эсгий тэргүүтнээр бүтээж хүн, эмээл хүндийг хэрэглэж шавар хөлсийг ав. Ирмэгц амраагаад усалж үдийн хойно нэг үе үсэргэж уяад хөлсийг хатсан хойно усаар угаасугай. Дөрөв, тав, зургадугаар хоногт өдөрчлөн энэ ёсоор хөлс ав. 

Хөлсний өнгө цайвар, амт нь хужиртай, ус мэт бол гүйцсэний шинж. Иймийн тул нэг явдал хасаж үсэргэ. Хөлсний өнгө хиртэй мэт, амт нь уруул хорсгох бол дахиж бүтээж хөлөргө. Хөлс магад гүйцлээ гэхээр нэг явдал хасаж уя. Эдгээр гүйцсэний эцэст тарган морь бол нимнэж уяцгаа. Бас тарган моринд нимгэн тохом, эцэнхий моринд зузаан тохом тохож хөлсөл. Хөлс дүүрсний хойно орой барьж, эрт тавь. Гэдэстэй бөгөөд хөлс гүйцвэл усыг сольж гэдсийг ав.
Сорилтоос хойш үзэсгэлэнтэйгээр ойрхон давхиад хэдий чинээ аваас хоёрдугаар хоногийн газраас давхиад ер хөлсийг нэг хэмжээгээр ав. Үсэргэхдээ өдөр тутам нэмж холтго.
Алив морины хөлсийг авч чадвал яс шөрмөс махны хорыг авахын тулд сайн хэмээнэ. Баас аван чадвал цул сав махны завсрын хорыг авна. Уяаны заслын эрхэм эрдэм үлгэрлэвэл өвчтэй хүнд анагаах эмийн рашаан хэмээгдсэн морин эрдэнийн хөлс авахыг шинжлэх ёсны нууцын дөрөвдүгээр зүйл буй.

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна