Аймгийн Алдарт уяач Н.Амарбаясгалан: Унаган азарга төрийн наадмыг өнгөлж огшоолоо

Сэтгүүлч
2020 оны 8-р сарын 24 -нд

2013 оны наадмаар хул даага түрүүлгэн говьчуудынхаа магнайг тэнийлгэсэн Өмнөговь аймгийн Ханбогд сумын харьяат, аймгийн Алдарт уяач Нэргүйн Амарбаясгалан АХ-ын 99 жилийн ойн баяр наадамд будан азаргаа айргийн дөрөвт хурдлуулсан. Тэрээр баярын сэтгэгдлээ ийн хуваалцлаа. 

-Ямагт анхдагч байдаг танд баяр хүргэе. АХ-ын 99 жилийн ой, үндэсний их баяр цэнгэл наадамд адуун сүргийн манлай азарга айрагдуулж, Ханбогдчуудаа манлайлсан сэтгэгдлээсээ хуваалцаач.

-Баярлалаа. Долоон жилийн өмнө хул даагаа түрүүлгэн Ханбогд сумаас төрийн наадмын түрүү хүртсэн анхны уяач болж байсан бол өнөөдөр азарга айрагдуулж, нутгийн олноо баясгалаа. Би андуураагүй бол манай сумаас төрийн наадамд дээд насны морь айрагдуулсан түүх байхгүй. Тэгж үзвэл таны хэлсэнчлэн уугуул нутагтаа анхдагч болж, унаган азаргаа төрийн наадамд айрагдууллаа.

-2020 оны цор ганц наадмын талаарх сэтгэгдлээсээ хуваалцаач. Таны хүсэн хүлээж байсан наадам болж чадав уу?

-Монгол хүн бэлгээрээ, хятад хүн бэлээрээ гэдэг. Төрийн наадам сайхан боллоо. Миний хувьд буурал азаргаа айргийн дөрөвт хурдлуулж, Ханбогдчуудаа баярлуулсандаа сэтгэл хангалуун байна.

-Ийм баярт агшинд бэлтгэлтэй байсан бололтой.

-Өнөө жилийн төрийнхөө наадамд уралдана гэсэн зорилго тавьж, сар шинийн өмнөөс эхлээд л Өлзийт хороололд морьдоо авчраад Уртнасангийн Тамир гэдэг дүүтэйгээ хамтран уясан. Буурал азарга маань дунд сунгаанаас эхлээд айрагдаж мэдэхээр байсан тул сэтгэл зүйн хувьд бэлтгэлтэй байсан.


-Даага түрүүлгэхээс өөр мэдрэмж үү?

-Тэгэлгүй яахав. Дээд нас, адуун сүргийн манлай азарга гэдгээрээ аргагүй өөр санагддаг юм байна.

-Сум орон нутагтаа хэрхэн наадсан бэ?

-Өнөө жилийн тухайд наадам болох эсэх тухайд баахан эргэлзэж, болох нь гэсний дараа ямар морьд уралдах бол гээд бас нэлээд сураг тавилаа. Тийм болохоор улсын наадмаас өөр газар морь уралдуулаагүй ээ. Би ер нь 2017,18,19-нд морь уяагүй. Хэсэг завсарласан.

-Ярилцлага эхлэхээс өмнө “хүнд өгсөн адуу сайхан давхисан” хэмээсэн. Тэр талаараа дэлгэрүүлээч.

-Миний хүн амьтанд бэлэглэсэн, зарсан адуунууд сумын наадамд сайн давхисан байна лээ. Жишээлбэл, Номгон багийн уяач Мөнгөний хар азарга Ханбогд сумын наадамд түрүүлсэн. Тэр манай унаган адуу байгаа юм.Мөн миний бэлгэнд өгсөн Дэлгэрбаярын хар соёолон дөрвөөр давхисан байсан. Түүнээс гадна улсын наадмын азарганы уралдааныг долоон км өнгөлсөн Сайхандэлгэрийн зээрд  азарга миний унаган адуу. Ноднин Говьшанхад дөрвөөр давхисан адуу.

Олон аавын хөвгүүд мөрөөдөж явдаг төрийн наадмын дэвжээг миний унаган азарга долоон км хөтөлж, суунгуут будан азарга маань нэхэж уралдсаар айрагдсан нь бахтай сайхан байлаа.

-Бахдалт уралдаан болжээ.

-Огших, бахархах гэдэг багадсан уралдаан болсоон. Гэхдээ би сэтгэл хөдлөлөө тэгтээ илэрхийлээд байдаг хүн биш.

-Анзаарагддаг. Өнөө жилийн тухайд төрийнхөө наадамд хэдэн насны морьтой ирсэн бэ?

-Азарга, даага хоёртой ирээд, азаргаа айрагдуулж, даагаа есөөр давхиуллаа.

-Сайхан нааджээ. Ярилцсанд баярлалаа.

-Тод магнай сэтгүүлийнхээ хамт олонд ажлын амжилт хүсье.  

Б.Хастөр

2 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.