Баянхонгорын бүсэд эхний 10-т хурдалсан их насны морьд

Баянхонгор аймгийн түүхт 80 жилийн ойд зориулсан хангайн бүсийн уралдааны их насанд 100-гаад хүлэг бүртгүүлж шандас шалган уралдсанаас эхний 10-т:

1.Баянхонгор аймгийн Бууцагаан  сумын уугуул, аймгийн Алдарт уяач Галсангийн Болдбаатарын хар. Говь-Алтай аймгийн Есөнбулаг сумын харьяат Цогбаярын унаган  хар морины уяа сойлгыг аймгийн Алдарт уяач Галсангийн Болдбаатар өөрөө тааруулж, уралдаанч Чинбатын Чулуунбат хүү унаж хурдлуулжээ.

2. Баянхонгор аймгийн Бууцагаан  сумын уугуул, Биндэръяагийн Батсанаагийн хээр. Тод манлай уяач Б.Билэгдэмбэрэлийн унаган хээр морь өнгөрсөн жил Сэлэнгэ аймагт болсон хойд бүсийн уралдаанд соёолон айрагдаад, АХ-ын 100, 101 жилийн ойд аравт хурдалсан. Уяа сойлгыг аймгийн Алдарт уяач Галсангийн Болдбаатар тааруулсан бол Хишигбаатарын Өсөхбаяр хүү унаж хурдлуулжээ.

3.Архангай аймгийн Эрдэнэбулган сумын уугуул, МУ-ын Манлай уяач Гончигжавын Мөнхсайханы бор. Шүдлэндээ Ламын Гэгээний 380 жилийн ойн бүсийн уралдаанд айрагдаж байсан бор морь Г.Мөнхсайханы унаган хүлэг бөгөөд уяа сойлгыг Батсайханы Дорж уяач тааруулсан бол Нэргүйн Эрдэнэжаргал хүү унаж хурдлуулсан байна.

4.Завхан аймгийн Цагаанчулуут сумын уугуул, МУ-ын Манлай уяач Балдоржийн Баярдоржийн хүрэн. Улс, бүсийн уралдаанд нэг түрүүлж, нэг айрагдсан хүрэн морь уяачийн унаган хүлэг бөгөөд МУ-ын Алдарт уяач Эрдэнэбатын Баянзул уяа сойлгыг нь тааруулдаг юм. Хангайн бүсэд Батбаярын Баттулга хүү унаж хурдлуулжээ.

5.Төв аймгийн Аргалант сумын уугуул, МУ-ын заан Дорлигжавын Амгаланбаатарын халтар. Төв аймгийн Аргалант сумын угшилтай аймгийн наадамд нэг айрагдсан халтар морийг Тод манлай уяач Түмэндэлгэрийн Ихбаяр уяж, Наранцэцэгийн Төгөлдөр хүү унаж хурдлуулжээ.

6.Баянхонгор аймгийн Гурванбулаг сумын уугуул, МУ-ын начин Базаррагчаагийн Сэр-Одын хүрэн. Дорнод аймгийн Хөлөнбуйр сумын гаралтай хүрэн морины уяа сойлгыг Лүндээдоржийн Баянжаргал уяач тааруулдаг бөгөөд Мөнхцэцэгийн Пүрэвбат хүү унаж хурдлуулжээ.

7.Орхон аймгийн Баян-Өндөр сумын уугуул Жамбалдоржийн Батсуурийн хүрэн. Хүрэн морины уяа сойлгыг аймгийн Алдарт уяач Даваажавын Энхбаатар тааруулдаг бол Зоригоогийн Бат-Эрдэнэ хүү унаж хурдлуулсан юм.

8.Баянхонгор аймгийн Галуут сумын харьяат Бадамсанаагийн Анхбаярын хүрэн. Өнөө жил Төв аймгийн баяр наадамд аман хүзүүнд хурдалсан хүрэн морины уяа сойлгыг Энхтайваны Энхбаяр тааруулж, Бат-Эрдэнийн Тэмүүжин унаж хурдлуулжээ.

9.Увс аймгийн Зүүнговь сумын уугуул, аймгийн Алдарт уяач Бадарчийн Норовсамбуугийн хээр. Унаган хүлгийнх нь уяа сойлгыг МУ-ын Алдарт уяач Мягмарсүрэнгийн Алтан-Очир тааруулж, Э.Номин-Эрдэнэ унаж хурдлуулсан байна.

10.Баянхонгор аймгийн Баянхонгор сумын харьяат аймгийн Алдарт уяач Жанчивын Жасрайдоржийн хар алаг. Аймгийн бүсийн уралдаанд арваад түрүүлж, айрагдсан энэ хурдан хүлэг Сүхбаатар аймгийн Асгат сумын адуу бөгөөд Сүхбатын Төмөрбаатар уяа сойлгыг нь тааруулж, Мөнхөөгийн Хишигбаяр хүү унаж хурдлуулжээ. 

Б.Хастөр