Тод манлай уяач Г.Батхүү:” Төрийн наадамд азарга, их нас, соёолон түрүүлгэсэндээ омогшиж явдаг”

А.Тэлмэн
2012 оны 3-р сарын 08 -нд

-Луу жилийн өнгийг тольдон одтой сайхан наадсан танд баяр хүргэе?

-Баярлалаа. Моринд дуртай монголчуудын унших дуртай “Тод магнай” сэтгүүлээрээ дамжуулан мэндчилж байгаадаа баяртай байна. Луу жилийн эхлэл сайхан байна. Энэ нь ганц миний хувьд биш, нийт монголчуудын хувьд өнгөтэй сайхан байна гэдэгт итгэлтэй байна.

-Луу жилийн босгон дээр уяачдын дээд цол хүртсэн. Хорин жилийн хөдөлмөрөө үнэлүүлэх тэр мөч мартагдашгүй сайхан байсан биз?

-Өө тэгэлгүй яахав. Сайхан байсан. Хийснээ үнэлүүлэх шиг сайхан зүйл байдаггүй шүү дээ. Мөрөөдөж явсан цолоо авч, хурдан морины төлөө сэтгэл зүрхээ зориулсан хорь гаруй жилийн хөдөлмөрөө үнэлүүлсэн тэр мөч миний амьдралын баяр жаргалтай мөчүүдийн нэг байсан. Адуу гэдэг хийморилог амьтантай нөхөрлөсөн 20 жилийн хугацаанд төрийн наадамд азарга, их нас, соёолон түрүүлгэж, нийтдээ гурван түрүү, 17 айраг хүртсэн байдаг юм.

-Төрийн наадамд дээд гурван нас түрүүлгэнэ гэдэг тэр бүр тохиохгүй завшаан байх шүү?

-Тиймээ, моринд дуртай эр хүний хувьд энэ амжилтаараа бахархаж омогшиж явдаг

-Тод манлай уяач цолыг тань Соёмбо зээрд аман хүзүүний амжилтаар мялаалаа?

-Монголчууд цолоо батална, мялаана гэж ярьдаг. Соёмбо зээрд маань эзнийхээ төдийгүй нийт монголчуудынхаа хийморийг өргөж сайхан давхилаа. Баяртай байна. Миний зээрд азарга үнэхээр хурдан юм. Тав уралдаж, хоёр түрүүлж, гурав аман хүзүүдлээ. Тэр дундаа “Дүнжингаравын хурд-2012” уралдаанд хоёр дахь удаагаа аман хүзүүнд хурдалж байгаа нь энэ.

-Их нас, соёолон яаж давхисан бэ?

-Соёолон 17, их нас 40 гаргаж ирлээ. Зун нь хур бороотой газар дэлэгнэж, намар нь урт сайхан болсон болохоор адуу тарган сайхан орсон. Тэр хэрээрээ адуу их хурдан байх шиг байна.

-Ярилцсанд баярлалаа.

-Та бүхэнд ч гэсэн ажлын амжилт хүсэж, нийт уаячиддаа уясан морь нь түрүү магнай, унасан хүүхэд нь тод магнай байхыг хүсэн ерөөе.

А.Тэлмэн

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна