Сумын Алдарт уяач Д.Хадбаатар: Алтангадас хавийн зээрд адуунууд хурдан шүү

 -Хорь гаруй жил хурдан морь уяж байгаа гэсэн. Анхны айргаа хэзээ хүртэж байв даа?
- Цэргээс  халагдаж ирээд л 1986 оноос хойш морь уясан. Хамгийн анх Хөхморьт суманд болсон “Бага олимп”-д соёолон айрагдуулж байсан юм байна. Тэрнээс өмнө жижиг наадмуудад олон орж айраг, түрүү хүртэж байсан ч медаль гэж байгаагүй. Өнөөдрийн байдлаар жижиг том наадмуудаас нийт 40 гаруй медаль авсан байна лээ.
- Хэдэн онд сумын Алдарт уяач болсон юм бэ?
- 2008 онд сумын Алдарт уяач болсон.
- Адууныхаа цусыг хэр сэлбэж байна даа?
- Өөрийн унаган адуугаар голдуу нааддаг даа. Сүүлийн үед гаднаас ганц нэг адуу авч байнаа. Завханы Дөрвөлжингөөс авсан алаг морь нэлээд хэдэн наадамд түрүүлж айрагдсан. Манай сумын Алтангадас хавийн зээрд адуунууд уг нь хурдан ш дээ.
-Хаагуур голдуу наадаж байна?
- Зуны цагт бол хаана л наадам байна, тийшээ явна. Ойролцоох сумдыг бол алгасахгүй дээ. Манай сум адуу Говь-Алтайдаа  хурдан гэдэг нь үнэлэгдчихсэн болохоор манайхан тараад л явцгаачихдаг юм. Бусад аймгийнхан “Говь-Алтайд ганцхан Баян-Уул гэж сум байдаг юм уу, хаана л очно Баян-Уулын морьд гэх юм” гэж асуудаг шүү. /инээв/ Тэгтэл нь хашраана гэдэг бас нэг талаараа сайхан.
- Өнгөрсөн хорь гаруй жилийн хугацаанд хамгийн их сэтгэлд хоногшсон наадмынхаа дурсамжаас хуваалцаач?
- 2008 онд Завхан аймагт болсон ургийн баярыг нэрлэмээр байна. 190 гаруй өрх нийлж их том наадам хийсэн юм. Манай Баян-Уул сумынхан тэр баярт очоод миний их морь түрүүлж мотоциклоор  шагнуулсан. Морь уяад авсан хамгийн том шагнал л тэр байсан  даа. Тэндээсээ шууд Завханмандал сумын сургуулийн ойд очиж их морь тавлуулж, хязаалан гурвалуулсан. Би ерөөсөө хоёр настай л явсан юм.
- Ийм сайхан дурсамжит наадам олон байх болтугай. Амжилт хүсье.