Аймгийн Алдарт уяач Д.Энхбаяр:Өөрийгөө гайгүй унаач байсан гэж боддог

- Адуучин аавын хүү гэл үү?
- Манай аав Дашдорж нэгдэлд 21 жил адуу хариулсан. Өөрийн чинь хэлснээр адуучин аавын хүү болж адуун дэл дээр бага насаа өнгөрөөсөн дөө. Долоон настайгаасаа эхлээд хурдан морь унасан. Өөрийгөө гайгүй унаач хүүхэд байсан гэж боддог шүү/инээв/. Манай аавд хувьсгалт төрийн хурдан зээрд гээд хурдан морь байсан юм. Тэр үед моринд тиймэрхүү чимэг өгдөг байлаа шүү дээ. Сумын наадмын үзүүр, түрүүнд л яригддаг адуу. Зээрд морио унаж таван түрүүний эзэн болж байлаа. Түүнээс гадна бас нэг шар хээр морь байсан. Ер нь аавын минь уядаг олон сайхан хурдан буян байсан даа.
- 20 даага сургавал 1 баярын бичиг өгдөг байсан гэж та түрүүнд ярьж байсан. Нэг зундаа хичнээн даага сургахав?
- Дан ганц даага сургахгүй шүү дээ. Адуугаа хураана, гүү ивэлгэнэ. Алдуул малын эрэлд явна. Нэгдлийн адуу чинь өдөрт саах сүүний нормтой учраас өглөө эрт хураагаад хоёр цаг тутамд ивэлгэж саана шүү дээ. Тэгэхээр тэр болгоны завсар зайгаар л даага эмнэг сургана гэсэн үг. Нэг зундаа голдуу 24-25 эмнэг сургана. 20 даага сургахад нэг даага өгдөг байхад хоёр ч даага урамшуулалд нь авч байсан.
- Хэдэн оноос эхлэн бие даан морь уяж байгаа вэ? Өнгөрсөн хугацаанд хичнээн айраг түрүү хүртсэн бол?
- Ааваасаа хойш л бие даан морь уяж байна. 2000 онд сумынхаа 70 жилийн ойгоор даага аман хүзүүдүүлж анхны айргаа авч байлаа. Аймгийн Алдарт уяач цол хүртэхдээ 40 гаруй айраг түрүүтэй байсан.
- Амжилтаа ахиулж улсын цолонд хүрэх ерөөлийг тавья.