Аймгийн Алдарт уяач Б.Даваадорж: Найз нөхөд маань намайг булган сүүлтэй хэмээн бэлгэшээж байгаа

 -Өнгөрсөн жилийн улсын баяр наадамд айрагдаж түрүүлсэн хүлгэдээс амжилтаа бататгасан гурван ажнайн нэг нь таны хар шүдлэн болж байна. Түүхт ойн наадамд хурдан хүлгээ айрагдуулсан танд баяр хүргэе?

-Баярлалаа. Морь айрагдана гэдэг уяач, унаач, эзэн, морь гээд олон хийморь цогцолж байж сая гүйцэлддэг нарийн тохиол. Хар үрээ маань моринд дуртай наадамчин олныхоо урмыг тэтгэж, амжилтаа бататгасанд үнэхээр баяртай байна. “Тод магнай” сэтгүүлээрээ дамжуулаад соёолон айрагдуулсан Ганболд ахдаа баяр хүргэе. Манай уяанаас хоёр адуу ирээд хоёулаа айрагдсан нь уяачийн маань ур чадвартай салшгүй холбоотой.
-Нээрэн таны морьдын уяаг Ганзориг уяач тааруулдаг билүү?
-Тиймээ, сүүлийн үед сайн уяж байгаа уяачдын нэг. Сая Уянга сумын 80  жилийн ойн баяр наадамд бид бас их амжилттай наадаж, гурван түрүү, гурван айраг хүртсэн. Хра шүдлэн маань тэнд бас түрүүлсэн. Энэ дашрамд хар үрээний маань эзэн Халтар ахдаа ийм сайхан хурдан буян хайрласанд нь баярласнаа илэрхийлмээр байна.
-Хар үрээ Сүхбаатар аймгийн Халзан сумын уугуул Мөнхтөрийн унаган адуу гээгүй бил үү?
Өнгөрсөн жил жаахан эндүүрэл гараад, танай сэтгүүлд ташаа мэдээлэл өгсөн байна лээ. Сүхбаатар Аймгийн Мөнххаан сумын уугуул Занхайн Халтар гэдэг хүний унаган адуу юм билээ, миний хар үрээ.
 -Энэ жил Өврийн хангайн уяачид өмтэй сайхан наадлаа. Магадгүй хар үрээний эзэн тэрхүү өмийг нээж өгсөн байх?
 -Найз нөхөд маань намайг булган сүүлтэй хэмээн бэлгэшээж байгаа. Яагаад гэхээр миний хар даагыг улсад айрагдахаас нэлээд хэдэн жилийн өмнө МУ-ын Алдарт уяач Б.Отгоннасангийн нэг даага улсад айрагдаж байсан юм билээ. Түүнээс хойш өнгөрсөн жилийг хүртэл улсын наадмын айраг түрүү нэг хэсэг тасраад байсан. Харин энэ жил манай өвөр хангайчууд үнэхээр амжилттай сайхан наадлаа. 
 -Даваадорж  багадаа хурдан морь унадаг байсан гэдэг бил үү?
-Тиймээ,  миний бага нас бусдын адил малын захад өнгөрсөн. Хурдан морь сонирхох болсон маань ч гэсэн тэрэнтэй холбоотой. Хамгийн анх Дорноговь зүгийн халиун үрээ авч сумандаа түрүүлгээд их урамшсан даа. Түүнээс хойш хурдан том жижиг наадмуудад амжилттай сайхан наадаж, эр хүний баяр жаргалыг мэдэрч явна.
-Аймгийн Алдарт уяачийн болзол хангасанд баяр хүргэе. Хар үрээнээс гадна өөрийн тань нэрийг дуурсгасан ямар хурдан хүлгэд байдаг вэ?
- Сүхбаатар аймгийн Дарьганга сумын угшилтай Идэр хээр азарга маань байна. Соёолонд нь найзаасаа авсан юм. Сая Уянга сумын 80 жилийн ойд түрүүлсэн. Шүдлэн хязааландаа мөн тус тус аман хүзүүнд хурдалж байсан хурдан буян байгаа юм.
-Сүүлийн үед моринд орж байгаа залуус шинэ монгол адуу гарган авахад нэлээд анхаарах болж. Таны хувьд?
-Одоогоор бодсон юм алга. Гэхдээ адууныхаа цусыг холдуулж чанарыг нь сайжруулах ёстой учраас яваандаа энэ тал дээр арга хэмжээ авнаа.
-Сэтгэгдлээ хуваалцсан танд баярлалаа. Хурдан морины босоо цагаан хийморь таныг өнөд ивээж явах болтугай

"Тод магнай"сэтгүүл дугаар 19