Англи адууны төрөлжсөн сайт нээгдлээ

Дэлхий дээр маш олон үүлдрийн адуу байдаг ч зөвхөн цэвэр цусны адуу л хурдан хурцаараа, гоёмсог төрхөөрөө шагшигдаж, өнөөдрийн хурдан морины уралдааныг төлөөлж байгаа билээ. Тодруулбал, хурдан морь сонирхогчид төдийгүй, бүх л хүмүүс хурдан морины уралдаан гэдгийг зөвхөн цэвэр цусны адуугаар ойлгож, хүлээн авдаг болоод байна. Ер нь цэвэр цусны буюу англи адуу нь хүн төрөлхтний түүхэн дэх гайхамшигт амьд бүтээлийн нэгэнд тооцогддог гэж судлаачид үздэг.

Сүүлийн жилүүдэд манай уяач, бридерүүд гадаадаас хурдны үүлдрийн адуунууд оруулан ирж, өөрсдийн адуугаа хурдны чиглэлээр сайжруулах үржил селекцийн ажил хийж өндөр үр дүнд хүрснийг бид бүгдээрээ мэдэж байгаа. Эдгээр бридерүүд маань импортоор орж ирсэн олон үүлдрийн адуунуудаас цэвэр цусны адууг хамгийн хурдан гэдгийг ойлгон мэдэрсний илрэл нь сүүлийн үед англи адуу оруулж ирэх сонирхол илт давамгайлах болсон явдал гэж үзэж байна. Манай тэргүүлэх бридерүүд Америк, Англи улсуудаас цэвэр цусны адуу оруулж ирэх ажлыг эхлүүлж байгааг энд онцлон тэмдэглэх нь зүйтэй.

Нөгөө талаас хурдан морины уралдааны хөгжлийн дараагийн нэгэн үе шат бол цэвэр цусны адууны сонгомол уралдааныг эх орондоо хөгжүүлэх явдал юм. Манай клуб энэ ажлын эхлэл болгож, цэвэр цусны адууны уралдааныг хөгжүүлэх их үйлсэд хувь нэмрээ оруулах зорилгоор хаврын ойрын зайн уралдааныг зохион байгуулахаар ажиллаж байгаа билээ.

Олон хүнд хурдан хүлгийн төвөргөөнөөр төсөөлөгддөг эх нутагт маань дэлхийн жишигт хүрсэн сонгомол уралдаан хөгжих цаг удахгүй ирнэ гэдэгт итгэлтэй байна. Иймд манай клубээс Монголынхоо хурдан морь сонирхогчдод зориулан цэвэр цусны адууны бүх төрлийн мэдээллийг агуулсан www.mongoljockeyclub.com цахим хуудсыг шинээр нээн ажиллуулж байна.

Та манай цахим хуудсанд зочилсноор цэвэр цусны адууны бүх төрлийн уралдааны тухай мэдээлэл, алдар цуутай уяачид, бридерүүд, домогт хүлгүүдийн талаарх түүхэн болон орчин үеийн шинэ соргог мэдээ, мэдээллийг цаг тухайд нь хүлээн авах боломжтой болно.

Бидэнтэй ижил зорилготой, үзэл бодол нэгтэй, хурдан моринд зүрх сэтгэлээ зориулж, үндэсний гайхамшигт соёл, уламжлалаа дэлхийн түвшинд хөгжүүлэх зорилготой хэн бүхнийг хамтран ажиллахыг урьж байна.

Монгол Жоки Клуб.