Хурдан морь унаач С. Эрдэнэбулган: Би 6 настайгаасаа морь унаж эхэлсэн

Дорнодын МСУХ байгуулагдсаны 15 жилийн ойн нэрэмжит дээд гурван насны уралдаанд  түрүү магнайд хурдалсан соёолонгийн унаач С.Эрдэнэбулган манай энэ удаагийн зочин байлаа. Ёстой л хурдан морины нуруун дээр дэрвэж явдаг бяцхан жаалуудыг харахад өөрийн эрхгүй өхөөрдөх сэтгэл төрдөг юм. Хараад байхнээ үеийнхнээсээ илүү хэвлүүхэн, хэрсүү ч болчихсон юм шиг. Тэдний хувьд мориноосоо унаж гэмтэхээс эхлээд олон бэрхшээл байх ч хүүхдийн гэнэн цагаахан сэтгэлээр огт түүрдэггүй гээд л зогсох нь бий. Энэ удаагийн Дорнодын уралдаан  нь унаач хүүхэд бүрт хамгаалалтын малгай /каск/ өмсүүлсэн нь ярих биш ажил хэрэг болгож болдогийг харуулсан тод жишээ байлаа. Ингээд бяцхан унаачтай ярилцсанаа хүргэж байна.
-Баярын сэтгэгдлээсээ бидэнтэй хуваалцаач.
-Намайг С.Эрдэнэбулган гэдэг. Хэнтий аймгийн Баян-Адарга суманд 7-р ангид сурдаг. Энэ уралдаанд Бадамдорж ахынхаа хүрэн соёолонг унаж түрүүлгэлээ. Баяртай байнаа. Хүрэн соёолон бидний хувьд энэ уралдаан анхных байлаа.
-Хэдэн наснаасаас морь унасан бэ?
-Би 6 настайгаасаа морь унаж эхэлсэн. Одоо 7 дахь жилдээ унаж байна. Миний аав морь уядаг болохоор  хүүхэд гэлтгүй морины тухай мэднэ шүү.  Морь  унах цаанаа л гоё байдаг юм. Үгээр хэлэхийн аргагүй.
-Аймгийнхаа оны шилдэг унаач гэж байсан. Амжилтуудаасаа  ярьж өгөөч?
 -Тиймээ. 2009, 2011, 2010 оны шилдэг унаач хүүхдээр шалгарч байсан. Хэнтий бүсийн наадамд 2008 онд түрүүлсэн. Сая бас “Сэцэнханы хүлэг”-т азарга дөрвөлүүлж, их нас аман хүзүүдүүлсэн. Сумандаа, Норовлин, Цагаан-Овоо, Биндэрт түрүүлж байлаа. Дадалд соёолонгоо  түрүүлгээд, шүдлэн аман хүзүүдүүлж, дараа нь дахин очоод хүрэн үрээ аман хүзүүлсэн.  Энэ жил суманд өөрийнхөө халзан үрээтэй дөрөвт орж, бас зээрд үрээтэй түрүүлгэсэн. Саарал халзан  даагаа гуравт оруулсон. Бүсийн наадмууудаас Дүнжингаравт оролцсон ч морь маань төхөөрөмж дээр эргээд үргээд  би ойччихсон. Одоо үүнээс илүү амжилт гаргана даа гэж бодож байгаа.
-Баярлалаа.
                                                                                                                                                    Ш.Бадмаа