Шигшмэл удамт адууны дуудлага худалдаа зохиогдлоо

Хурдан хүлгийнхээ тоосоор тэнгэрт цацал өргөн Монголын ард түмнээ баясган, улс бүсийн наадмын алтан шар зурхайг чимэж яваа "Босоо хүлэг" гал уяаны хамт олноос хурдан морь сонирхогчиддоо зориулан "Шигшмэл удамт адууны дуудлага худалдаа"-г 4-р сарын 14-ний өдөр “SS Club”-т зохион явууллаа.

Энэ удаагийн дуудлага худалдаанд цэвэр цусны англи азарга, араб азарга, будённый гүү болон эрлийз үрээ, байдас, даагануудыг оролцуулжээ. Мөн ид хурдалж байгаа монгол үрээг дуудлагаар худалдсан юм. 
 Түүнчлэн дуудлага худалдаанд бүртгүүлж амжаагүй зарим бридерүүд хурдан удамтай эрлийз болон монгол адуунуудаа худалдахаар авчирч олонд сонирхуулж байлаа.
Нийт 18 адууг дуудлага худалдаанд оруулснаас 10 гаруй адуу зарагдаж шинэ эзэнтэй болсон байна. Эдгээрээс Дорнод аймгийн Чойбалсан сумын уяач н.Жаргалсайханы хурдан бор үрээ 25 сая төгрөгнөөс эхлэн дуудагдаж хамгийн өндөр үнээр буюу 30 сая төгрөгөөр зарагдсан байна.
Мөн Завхан аймгийн Тосонцэнгэл сумын уугуул, “Уулс Трейд” ХХК-ний захирал Т.Галбадрахын цэвэр цусны Бархат дуудлагатай халтар азарга 18 сая төгрөгөөр зарагдсан байна. Хурдан удамтай шинэ монгол буюу эрлийз дааганууд 8 сая төгрөгнөөс дээш үнэтэйгээр зарагджээ. Ер нь сүүлийн жилүүдэд улс, бүсийн наадмуудад түрүүлж, айрагдсан олон үрээний төрсөн дүү дааганууд дуудлага худалдаанд орсон юм. Тухайлбал, Тод манлай уяач Д.Мөнхбатын бүсийн уралдаанд 2 түрүүлж, 1 айрагдсан зээрд үрээний төрсөн дүү халтар даага, Тод манлай уяач Ц.Батсайханы улс, бүсийн уралдаанд 4 айрагдсан Сүлд халзан үрээний төрсөн дүү хүрэн халзан даага, Т.Галбадрахын улсын наадамд 2 айрагдсан халзан үрээний төрсөн дүү ухаа үрээ, С.Ганзоригийн бүсийн уралдаанд айрагдсан халзан үрээний дүү халзан даага зэрэг олон сайхан даага дуудлага худалдаанд орсон байна.
Дашрамд сонирхуулахад хурдан адууны төрөлжсөн гэж хэлж болох анхны дуудлага худалдааг “Макс Групп”-ээс 2 жилийн өмнө зохиож байв. Мөн Макс группээс 3 жилийн өмнө Гавъяат жүжигчин н.Батбаярын хандивын тоглолтын үеээр зохиосон дуудлага худалдаан дээр зарагдсан даага энэ жилийн “Өмнөговь 2012” хаврын бүсийн уралдааны эрлийз морьдын уралдаанд айрагдсан билээ.

jockey.mn