Австралийн малчны адуу

А.Тэлмэн
2012 оны 5-р сарын 28 -нд

Орчин үеийн Австрали малчны гэгддэг энэ үүлдэр нь Өмнөд Африкаас 18-р зууны хоёр дахь хагаст Австрали тив руу оруулж ирсэн адууны удам юм. Гарал үүсэл нь тодорхойгүй ч тэдгээр  адуунууд Араб олон Бербер нутгийн  эрлийз цустай байсан хэмээн таамаглах нь бий. Энэ мэтээр газар газраас Австралид ирсэн олон адууны цус холилдсоор яваандаа Австралийн өргөн уудам талыг цуцалгүй туулдаг, уналга, ачлагаас гадна олон тооны хонь, үхэр сүргийг хариулж чадах тэсвэр сайтай шинэ үүлдэр бий болж, Австраличууд энэ үүлдрийг “уолер” хэмээн нэрлэх болжээ. Англи, Араб, Америкийн Кваттер, Пони, ачлагын Суффол зэрэг олон адууны цус холилдсон энэ адуу тэсвэртэй, өлчир чийрэг, зоригтой байж, Австралийн морин цэрэгт олон жил зүтгэжээ. Тиймээс 1971 онд энэ үүлдрийг албан ёсоор “малчны адуу” гэж нэрлэх болсон төдийгүй тэр жилдээ “Австралийн малчны адууны нийгэмлэг” байгуулагдаж энэ үүлдрийг цаашид улам боловсронгуй болгох тал дээр анхаарч эхэлсэн байна. Австралийн малчны адуу мал хариулгаас гадна морин уралдаанд ч тохиромжтой бөгөөд сэрвээгээрээ 152-166 см өндөр. Өргөн магнай, том нүд, хүзүү их биеийн харьцаа зөв, цээж төвгөр, нуруу чанга, зоо булчин?аг, хөл чангатай энэ адуу олон зүсмийн байдаг аж.


 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна