Өмнөд Америкийн Ковбой буюу Гаучо

Манайхан Ковбой гэхээр өргөн хүрээтэй бүрх малгай духдуулсан, урт цув нөмөрч, жинс өмссөн, юунаас ч айдаггүй эрэлхэг морьтонгуудыг төсөөлдөг. Харин орчин цагт зоригтой, шийдэмгий гэдэг утгаар нь  хаа сайгүй л лут эрчүүдийг ковбой гэх болжээ. Үүнд нэг жишээ татахад Өмнөд Америк тивд өөрийн гэсэн ковбой бий. Тэднийг гауча гэдэг аж.
Ковбой гэдгийг үгчилбэл үхэрчин хүү буюу үхэр туугч гэх утгатай. Харин гауча нь тэнүүлчин гэсэн утгатай үгнээс гаралтай байх юм. Гауча нар нь 16-17-р зууны үед Өмнөд Америкт цагаачлан ирсэн Испани, Португали гаралтай европчууд нутгийн индиан омгийн эмэгтэйчүүдтэй дэр нэгтгэн цус холилдсоноос үүссэн гэж үздэг. Одоогоор бол Аргентин, Уругвай, Бразилийн Риу-Гранди-ду-Сул мужуудад голчлон аж төрдөг. Моринд тун ч гарамгай улс байдаг гэж байгаа. Яг л монгол хүнийг морьгүйгээр төсөөлөхөд бэрхтэйн адил. Цагтаа тэд Өмнөд Америк даяар баячуудын малыг хариулан нүүдэлчдийн амьдралаар хэрэн тэнэж амьдардаг байв. Гэтэл тэдэнд аз таарч 18-р зууны сүүл, 20-р зууны эхэн үеэр Европоос шинэ цагаачдын маш том давалгаа ирэхэд газар нутаг, ёс заншлаа таван хуруу шигээ сайн мэддэг, төрөл садангийн өргөн холбоотой, догшин ширүүн ааштай гаучо нар ядуу европ цагаачдыг хөлслөн малаа хариулуулан өөрсдөө харин газрын эзэд болох нь тэр. Гэхдээ нүүдэлчдийн шүтэх ёсон, ширүүн дориун аашаа хаяж гээсэнгүй.
Дөнгөж шинээр бүрэлдэн тогтсон Өмнөд Америкийн улсуудын дотор байсхийгээд л иргэний дайн дэгддэг байжээ. Тэр болгонд талууд аль болох олон гаучог өөрийг талд татах замаар өрсөлдөгчөө ялахыг хичээдэг байв. Ингэснээр гаучо нар нэг ёсондоо хөлсний морин цэргийн үүрэг гүйцэтгэх болов. Дайн тулаан ихээр гардаг байсан 20-р зууны эхний хагаст энэ байдал гауча нарт ч, тэднийг хөлсөлдөг хүмүүс ч ашигтай байв.
Гэвч цаг хугацаа өөрчлөгдөж тайван цаг ирэхэд гаучо нарыг зэрлэг бүдүүлгийн хамгийн тод жишээ гэж энд тэндгүй хавчин хяхах болжээ. Харин энэ  байдал өөрчлөгдөхөд ард нийтээрээ гаучо нар бол тэдний түүхийн үнэт өв гэдгийг ухааран дэмжих болжээ.
Энд сонирхуулахад жил болгон Урагвайд болдог гаучо нарын наадмыг зориуд дурдая. Орон орны хэдэн мянган гаучо нар цугларан морийг хэн гарамгай эзэмшдэгээ тодруулахаар өрсөлддөг наадам юм. Тэдний үндэсний хувцас, бүс, малгай, дөрөө, эмээл гээд сонирхол татахаар зүйлсийг эндээс л нэг дороос харж болдог ажээ.