Тах

Тах  нь адууны туурайг элдэв механик гэмтэл, урт зам туулахад элэгдлээс хамгаалах зориулалттай.
Стандарт тах
Орчин үед хамгийн бага буюу 0 гэсэн хэмжээтэйгээс эхлээд хамгийн том буюу 8 хэмжээтэй хүртэл 13 янзын тахыг ашигладаг. Эдгээрийг хадах хадаас нь 4-9 хэмжээтэй байдаг. Стандартын дагуу тахны өргөс нь Н хэлбэртэй ба конус хэлбэртэй гэсэн хоёр янз байдаг. Өргөс нь өвлийн цагт гулгах, халтирахаас сэргийлэх зорилготой. Зөв сонгож авсан тах нь уян хатан эвэрлэг эдээс бүтдэг ул хэсэгт хүрэлгүй байрлаж байх ёстой.
Морин спортын тах нь өөрийн гэсэн стандарттай байдаг. Юуны өмнө спортын адууны тах нь хөнгөн бас бат бэх байх ёстой. Морин спортын адууг уралдаанаас 3-4 өдрийн өмнө тахыг нь шалган, шаардлагатай бол дахин тахлах ёстой байдаг.
Уралдааны морьдын тах
Саадтай уралдаанд оролцож байгаа адуунд гол төлөв урд хоёр туурайг тахладаг. Тахны масс нь 80-120 гр, зузаан нь 5-6 мм, өргөн нь 8 мм байдаг. Хурдан морины уралдааны тахыг өндөр чанарын хөнгөн ган, тусгай хайлшаар хийдэг. Уралдаан нь нойтон, эсвэл хальтиргаатай зам дээр болохоор бол трапец хэлбэрийн огтлолтой илүү нимгэн тахыг ашигладаг.
Олон төрөлтийн тах
Олон төрөлтөд оролцож байгаа адуунд доод талдаа 10 мм өндөртэй хажуу хүрээтэй, 180 грамм масстай тах ашигладаг. Уралдаан өвөл, эсвэл халтиргаатай зам дээр болох нь элбэг учраас 180-200 грамм жинтэй гурван өргөстэй дугуй тахаар тахладаг.
Конкурын тах
Конкурын тахын хоёр салааны зузаан нь туурайн хананы зузаанаас илүүгүй өргөнтэй байдаг. Туурайн хананаас илүү гарахгүй, хоёр салаан өсгийн хэсэг нь улны дотоод өнцгөөс илүү гарахгүй, урд хоёр тах нь дотор тал руугаа ташуу байх  ёстой.
Холч морьдын уралдаан
Холын зайнд хурд гаргах шаардлагатай болдог болохоор уралдаан болох газрын хөрсөнд тааруулан тахалдаг. Гол төлөв уралдааны өмнө 300 граммын гөлгөр стандарт тахаар тахалдаг.
Өвлийн тах
Мөсөн дээр халтирахаас сэргийлдэг болохоор хоёр салааны хоёр захаараа доод талдаа 10 өндөртэй босоо хүрээтэй, эсвэл дотор тийш хазайлгасан өргөстэй байдаг. Цас наалдахаас сэргnйлсэн ул ёроол өвлийн таханд байдаг.
Хатирч морьдын тах
Хатирчд морьдод янз бүрийн масстай хөнгөн тах хэрэглэдэг ч гол төлөв урд хоёр тах нь хойд хоёроосоо 25-40% хүнд байдаг. Ингэснээр хатираа нь жороо болох хандлагатай адууны явдлыг тогтоон барихад хамгийн тохиромжтой гэж олон тооны судалгаагаар тогтоожээ. Хатирахдаа тогтвортой, адил харьцаатай, илүү хөнгөн жинтэй тахаар тахладаг.
Насаар залуу хатирчдыг эхний үедээ тахладаггүй, эсвэл зөвхөн урд хоёр туурайг нь тахладаг.
Эмчилгээний тах
Өвчин , эсвэл гэмтлийн улмаас туурай гэмтсэн үед эмчилгээний тах хэрэглэдэг. Өвчний хэлбэрээс хамаараад янз бүрийн хэлбэр, хоногтой тах ашигладаг.