ОУХМ, Пара байт харвааны шигшээ багийн дасгалжуулагч Н.Даариймаа: Тамирчдын бэлтгэл хангагдсан гэж хэлж болно

“Лондон 2012” паралимпид оролцох баг тамирчдыг үдэх ёслолын үеэр байт харвааны дасгалжуулагч болон жудо бөх, байт харваа, хөнгөн атлетикийн жад шидэлтийн төрлөөр паралимпид оролцох тамирчидтай уулзсан юм.

-Энэ  удаагийн паралимпид хичнээн тамирчин дасгалжуулсан бэ? ? Бэлтгэл хэр байна?
-“Лондон 2012” паралимпийн 14-р наадамд хоёр тамирчин дасгалжууллаа. Спортын мастер Б.Жавзмаа, Б.Оюун-Эрдэнэ нарыг бэлтгэж оролцуулж байна. Энэ хоёр тамирчин маань 70 метрийн зайнаас  хоёр удаа харваад тэр хоёр удаагийн харвалтынхаа онооны нийлбэрээр  байр эзэлнэ. Энэ төрөлд нийт 32 тамирчин оролцож байгаа.  Бэлтгэлийн хувьд мэдээж олимп гэдэг утгаар нь дөрвөн жилийн туршид бэлтгэлтэй байдаг л даа. Ялангуяа сүүлийн хоёр жилд шаргуу бэлдсэн. Тиймээс тамирчдын бэлтгэл хангалттай хэмжээнд байгаа.
-Хоёр тамирчны хувьд олимпийн эрхээ ямар тэмцээнээс авсан бэ?
-Б.Оюун-Эрдэнэ маань Лондонд болсон дэлхийн аварга шалгаруулах тэмцээн, Азийн аварга шалгаруулах тэмцээнээс эрхээ авсан бол Б.Жавзмаа мөн Лондонд болсон тэмцээнээс эрхээ авч байсан. Олимп болох дөрвөн жилийнхээ сүүлийн нэг жилийн хугацаанд олимпид эрх авсан тамирчнаа бэлдэхэд анхаардаг. Цаашид яаж бэлдэх үү, бэлтгэлээ хэрхэн системтэй, зохион байгуулалттай болгох вэ гэх мэтээр багш хүний шийдэх ёстой асуудлууд байдаг. Тиймээс бид хүйтний улиралд Тайландад очиж хоёр сарын хугацаатай бэлтгэл хийсэн. Монголдоо ирээд 6-н сараас нь Эрдэнэт хотын төв баазад бэлтгэлээ хийсэн.
-Таны хувьд дасгалжуулагч багшаар хичнээн жил ажиллаж байна вэ? Өмнөх паралимпиудад дасгалжуулагч багшаар ажиллаж байсан байх?
-Би дасгалжуулагч багшаар 40-өөд жил ажилласан. Тамирчин байхдаа хоёр удаа паралимпид байт харваагаар орж байлаа. Дасгалжуулагч багш болсноосоо хойш 1996, 2008, 2012 оны паралимпид дараалан тамирчдаа бэлдэж оруулж байна. Энэ удаагийн олимпид монгол түмнийхээ итгэлийг биелүүлэхийн төлөө хоёргүй сэтгэлээр зүтгэж байна даа. Амжилт гаргана гэж итгэж байна.
-Ярилцлага өгсөнд баярлалаа. Монгол түмнийхээ итгэлийг алдалгүй, амжилт гаргаад ирээрэй гэж хүсье!

Пара байт харвааны шигшээ багийн тамирчин Б. Оюун-Эрдэнэ: Тайландад хоёр сар бэлтгэл хийсэн
-Лондон 2012 паралимпид ямар төрлөөр оролцож байгаа вэ? Энэ таны анхны олимп уу?
-Тиймээ. Миний анхны олимп учраас сэтгэл их хөдөлж байна. Ямар ч байсан амжилт  үзүүлнэ гэж зорьж байгаа. Би пара байт харвааны төрлөөр оролцоно. ОУХМастер Н.Даариймаа багш биднийг авч явах юм. 
-Бэлтгэл хэр хангагдсан бэ?
-Бэлтгэл дажгүй хангагдсан. Энэ жил тайландад хоёр сар бэлтгэл хийгээд, Эрдэнэтэд ирээд мөн хоёр сар бэлтгэл хийсэн.
-Энэхүү спортоор хэдэн оноос эхэлж хичээллэсэн бэ? Гаргасан амжилтынхаа тухай?
-Би 2003 оноос эхэлж байт харваагаар хичээллэж байна. Миний анхны багш Ю.Насанбат гэж багш маань байгаа. Энэ багш маань анх байтад хөтөлж оруулсан даа. Амжилтын хувьд Азийн гранпри тэмцээнээс хүрэл медаль авч байлаа. Тэгээд л монголдоо улсын аварга, хотын аваргаас медалиуд авсан байна.
-Өрсөлдөгч нараа хэр судалсан бэ? 32 тамирчин оролцоно гэж байсан?
-Голдуу мундаг мундаг тамирчид байгаа л даа. Ялангуяа Солонгос, Хятадын тамирчид их сайн. Ерөнхийдөө өрсөлдөгч нар маань жигдхэн, сайн хүмүүс байгаа. Гэхдээ эх орныхоо нэрийг гаргахын төлөө хичээнээ.
-Ярилцсанд баярлалаа. Амжилт хүсье!

Пара хөнгөн атлетикийн шигшээ багийн тамирчин Ч.Мөнх-Эрдэнэ: Олимпийн эрхээ сая авлаа
-Ээлжит паралимпид оролцох гэж байна. Сэтгэгдэл ямар байна?
-Сэтгэл маш өндөр байна. Сая сэтгүүлч нар шаваад тулгамдаад сайн ярьж ч чадахгүй байлаа. Би олимпийн эрхээ сая авлаа л даа. Энэ паралимпид хөнгөн атлетикийн жад шидэлтийн төрөлд оролцоно.
-Хэзээнээс энэ спортоор хичээллэсэн бэ? Олимпийн эрхээ ямар тэмцээнээс авсан бэ?
-Хөнгөн атлетикт ороод таван жил болж байна. Жад шидэлтэд 2-3 жил болсон. Их сонирхолтой санагддаг байсан учраас би энэ спортыг сонгож хичээллэсэн юм. Би Малайзийн Куало-Лампурт болсон олон улсын тэмцээнээс олимпийн эрхээ авсан.
-Өрсөлдөгч нар чанга биз?
-Манай төрөлд эхний аравт ордог арван хүн байдаг юм. Бид арав ана мана үзэж нэгнийхээ дээр гарахын тулд зүтгэдэг л дээ. Ерөнхийдөө нэгнийгээ мэддэг тамирчид байгаа. Мэдээж энэ их том тэмцээн учраас их сайн бэлтгэлтэй мундаг тамирчид оролцдог.
-Ярилцсанд баярлаалаа. Монголынхоо далбааг олимпийн тэнгэрт мандуулаад ирээрэй гэж ерөөе!

Пара жудо бөхийн шигшээ багийн тамирчин Д.Ганбат: Том хэмжээний үүрэг хариуцлага оногдлоо гэж бодож байна
-Паралимп хаяанд ирчихлээ. Бэлтгэл хэр хангагдсан бэ?
-Бэлтгэл сургуулилт сайн байсан. Одоо тэндээ очоод амжилттай барилдах л үлдлээ. Миний хувьд олимпийн эрхээ 2010, 2011 оны дэлхийн аваргад нэгэнд нь тав, нэгэнд нь 7-д орж авсан. Азийн наадмаас мөнгөн медальтай.
- Өрсөлдөгч нараа хэр судалсан бэ?
-Оролцох тамирчдынхаа 70 хувьтай нь барилдаад үзчихсэн. Тийм болохоор багштайгаа ярилцаад хэнтэй хэрхэн барилдах талаар тактик боловсруулсан байгаа.
-Энэ спортоор хэр удаан хичээллэсэн бэ? Таны анхны олимп байхаа?
-Багаасаа хичээллэсэн. Айлынхаа хүүхдүүдтэй барилдаж өссөн дөө. Дэлхийд хараагүй хүмүүс жудо бөхөөр барилддаг гэдгийг мэдсэн цагаасаа эхлээд сонгож, сонирхож хичээллэж эхэлсэн юм.  Миний анхны олимп учраас маш ихач холбогдол өгнө шүү дээ. Монгол улсынхаа далбааг олимпийн тэнгэрт мандуулхыг зорьж байна. Мөн хүн төрөлхтний их баяр наадамд монгол түмнээ төлөөлөн оролцож байгаадаа сэтгэл их өндөр байгаа. Үүний хажуугаар том хэмжээний үүрэг хариуцлага оногдлоо гэж үзэж байна.
-Ярилцсанд баярлалаа. Дэлхийд эх орныхоо нэрийг дуурсгаад ирээрэй.
                                                                                                                                                                        Ш.Бадмаа