Ази тивийн аварга шалгаруулах тэмцээн эхлэхэд нэг хоног үлдлээ

Монголын сагсан бөмбөгийн холбоо нь Засгийн газрын дэмжлэгтэйгээр Ази тивийн аварга шалгаруулах 22 дахь удаагийн тэмцээнийг эх орондоо анх удаа зохион байгуулах гэж байгаа билээ. Тэмцээний нээлтийн ажиллагаа өнөөдөр болж, маргааш тоглолтууд эхлэх юм.  Наймдугаар сарын 26 хүртэл Улаанбаатар хотноо үргэлжлэх шар тивийнхний сагсан бөмбөгийн тэмцээний нээлт, хүндэтгэлийн ёслол өнөөдөр 18.00 цагаас “Blue Sky” цамхагийн 10 давхарт болох бөгөөд хэвлэл, мэдээллийнхэнд нээлттэй ажээ.

Түүнчлэн өнөөдөр 14.00 цагаас  “Blue Sky” цамхагийн 10 давхрын хурлын зааанд тэмцээнд өрсөлдөх 16 багийн ахлагч, менежерүүдийн хурал болох бол үүний дараа 16.30 цагаас шүүгчдийн нэгдсэн хурал болж, энэ үеэр хэвлэл, мэдээллийнхэнд сонирхсон мэдээллийг өгөх юм байна.

Монголын баг зохион байгуулагч орны хувьд давуу эрхтэйгээр оролцох тус тэмцээнд багууд дараах дөрвөн хэсэгт хуваагдан өрсөлдөнө. Үүнд:

“А” группт: Хятад, Хонконг, Энэтхэг Ливан
“В” группт: БНСУ, Япон, Сингапур, Сири
“С” группт: Тайвань, Бахрейн, Индонези, Монгол
“D” группт: Иран, Казахстан, Филиппин, Саудын Араб гэсэн багууд багтжээ.

Хэсгийн шатанд багууд тойргийн системээр тоглож, хэсэг бүртээ эхний гурван байрт бичигдсэн, нийт 12 баг дараагийн шатанд дахин хоёр хэсэгт хуваагдан тоглох юм байна. Тэмцээний нээлтийн тоглолт 17-ны өглөө 10.00 цагт Сингапур болон Сирийн багийн хооронд болох аж. Монголын багийн тухайд эхний тоглолтоо 20.00 цагт Бахрейны багийн эсрэг хийх юм. Тэмцээний тоглолтууд Буянт-Ухаа дахь спорт цогцолбор болон Спортын төв ордонд 10-20.00 цагийн хооронд болох аж. Эхний шатны тоглолтууд 19-нд өндөрлөж, 20-ноос хоёрдугаар шат эхэлнэ. Ингээд 26-нд тэмцээний аваргууд тодрох болно.

Ази тивийн сагсан бөмбөгийн залуучуудын аварга шалгаруулах тэмцээнд оролцох Монголын багийн бүрэлдэхүүнд О.Дөлгөөн, Х.Анар-Эрдэнэ, Н.Ханбулаг, Ч.Энхтайван, Э.Энхтөгс, Д.Сонинбат, М.Батхишиг, Б.Алтанбагана, Б.Сүбээдэй, Г.Билэг-Ариун, Д.Хаш-Эрдэнэ, Л.Мөнхнасан, Д.Анхаа, М.Төмөр нарын тоглогчид багтжээ. Шигшээ багийн тамирчид дасгалжуулагч н.Ганзоригийн удирдлага дор бэлтгэлээ базаажээ.