Шинэ дугаар гарлаа

А.Тэлмэн
2017 оны 1-р сарын 31 -нд

Морьтон монголчуудын мөнхийн омогшил “Тод магнай” сэтгүүлийн цоо шинэхэн дугаар уншигч таны өмнө дэлгээстэй байна. Сэтгүүлийн минь амин сүнс болсон зочин хойморт Догшин хутагтын нутгийн хүү аймгийн Алдарт уяач Хархүүгийн Баатархүү уригдан заларлаа. Хурдан хээр азаргаа “Дүнжингаравын хурд-2014” хаврын бүсийн уралдаанд аман хүзүүдүүлж, “Хутагтын хурд-2015” говийн бүсийн хаврын уралдаанд түрүүлгэж байсан хийморилог залуу уяачийг хурдан морь сонирхогч эрхэм уншигч та бүхэн эчнээ таних бизээ. “Олон хүнийг баярлуулж байгаа зүйлд гар татах хэрэггүй гэж боддог учраас адууг нь ер нь хэлсэн үнээр нь л авдаг” хэмээн ярих Х.Баатархүү Алдарт төрийн зарлигт наадмын анхны айргаа 2010 оны “Хотгойдын хурд” хангайн бүсийн уралдаанд хүрэн морио таваар давхиулан хүртэж байсан билээ. Айлчлан ирж буй алтан унжуургат хэмээх гал тахиа жилийн босгон дээр хурдан хээрийн эзэнтэй хэрхэн хөөрөлдсөнийг 83 дахь дугаараас хүлээн авч уншаарай.
Монгол хүний хийж бүтээхийн төлөөх хүсэл эрмэлзэл, санасандаа хүрч, бүтээж чадсан бахархлыг хуваалцах ямагт таатай байдаг. Урилга илгээгээд хагас жилийн дараа уулзаж байгаа энэ удаагийн зочныг маань Лодонгийн Мөнх-Алдар гэдэг. “Захиалга ихтэй, завгүй байна. Гэхдээ “Тод магнай”-даа ярилцлага өгнөө” гэсээр цэцэгт зуны зургаан сараас цаст өвлийн идэр есийг хүргэсэн тэрээр гурван үеийн зураач, уран бүтээлч. Бүр тодруулбал “Ажлын дараа” хэмээх алдарт зургийн эзэн Урлагийн Гавьяат Зүтгэлтэн Гэлэгийн Одонгийн ач хүү. Удам, судар угсаа гарвалыг нь мэдэхгүй хэсэг нь хэдэн зууны тэртээгээс Монголчуудын эдэлж хэрэглэж ирсэн зэс домбыг цаг үетэй нь хослуулж, эргүүлэн авчирсан эрхэм гэдгээр нь эчнээ таних бизээ. “Би ажилдаа чин зүрхнээсээ дуртай, тийм ч учраас миний домбонуудад сэтгэл шингэсэн. Хэн хаанаас нь ч харсан өө сэв олохгүй. Тэр нь миний бахархал” хэмээн бахдангуй ярих Л.Мөнх-Алдар урлаачтай “Монголд үйлдвэрлэв” булан уулзуулна.
Уяачийн гэргий оролцдог “Хатан гоо” булангийн энэ удаагийн дугаарын зочны урилгыг Тод манлай уяач Д.Дагвадоржийн гэргий Сайхандаваагийн Өлзийхишигт илгээсэн билээ. “Шатахуун түгээх станцийн дэргэд очихоор аавыгаа санадаг. Миний аав чинь насаараа жолоо мушгисан хүн шүү дээ. Цэргийн ангид, нефть баазад, сүүлд нь талх чихрийн үйлдвэрт жолоочоор ажиллаж байсан. Хааяа гэрт харах хүнгүй болохоороо би аавынхаа кабинд суугаад хамт ажлыг нь хийлцэнэ. Нефть баазад ажилладаг байхад нь нэг удаа хамт хөдөө явж байсан юмдаг. Бага байсан учраас хаашаа явснаа санадаггүй. Гэхдээ 11-р хорооллоос гарч үзээгүй надад сонихон л байсан. Би тэгж л анх удаа хөдөө явж үзэж байгаа нь тэр. Аав маань цистр барьдаг байсан болоод тэрүү надад бензиний үнэр цаанаа л нэг дотно санагддаг юм” хэмээн өөдөөс харан инээмсэглэн суугаа энэ бүсгүйг ийм энгийн гэж төсөөлөөгүй ээ. Илүү дэлгэрэнгүйг “Тод магнай”-н 83 дахь дугаараас хүлээн авч уншаарай.
Хурдан морь сонирхогч, залуу уяачдадаа зориулан хүргэдэг “Мэдэхэд илүүдэхгүй” булан өнгөөр шинжих аргыг түгээж байна. Жор мэдэхгүй эмчээс зовлон үзсэн чавганц дээр хэмээх үгийг эрхэмлэдэг ардын уламжлалт эмчилгээг дээдлэгсдийн гарын авлага болсон “Хятад мал эмнэлгийн онолын суурь, зүү төөнөлөг” номноос хүргэж буй цувралын хоёр дахь болсон өнгөөр шинжих аргыг судлаад үзээрэй.
Эдгээрээс гадна “Тод магнай”-н уламжлалт булангуудад уяач, хурдан морь сонирхогчдын таалалд нийцэх олон мэдээллүүд багтсан гэдгийг дуулгахад таатай байна.
Та бүхэн “Тод магнай” сэтгүүлээ Интер номын салбар дэлгүүрүүд болон редакцийн 9401-2992, 9608-5886 дугаарын утсанд холбогдож авах боломжтой

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна