Аймгийн Алдарт уяач А.Нямбаатар: Хууль дүрэм нь тодорхой бөгөөд уяачдын эрх тэгш байхад л сайхан наадчихна даа

Сэтгүүлч
2021 оны 1-р сарын 23 -нд

-Төрийн наадмаас хоёр түрүү хүртсэн хийморилог залуу уяачид халуун баяр хүргэе. Баяр наадмынхаа сэтгэгдлээс хуваалцахгүй юу? 

-Баярлалаа. Нартай, хуртай сайхан зун боллоо. Энэ жил уралдсан нь цөөн ч хоёр түрүү хүртсэндээ баяртай байна. 
-Монгол төрийн наадамд уясан хүлгүүдийнхээ тоосыг өргөдөг болоод удаж байна уу?

-2014 оноос эхлээд долоо дахь жилдээ улсын наадамд оролцож байна. Тод манлай уяач Дугараа буюу Батхүрэлийн Бат-Өлзийгийн туслахаар ажиллаж байгаад 2013 онд Данзанравжаагийн мэндэлсний 210 жилийн ойд даага түрүүлгэж том наадмын амжилтаа эхлүүлсэн. Түүний дараа хавар буюу 2014 оноос Чинзориг ахын морьдыг уядаг болсон юм. Тэгээд  2016 онд Говь-Алтай аймагт болсон баруун бүсийн уралдаанд буурал морь, хээр даагыг нь түрүүлгэсэн. Мөн тэр уралдаанд Архангай аймгийн Чулуут сумын харьяат Цэдэнсодномын Энхболд гэдэг хүний зээрд даагыг эрлийз бага насанд түрүүлгэсэн. 
Дараа жил нь Зоригоо ахын Сарт зээрд азаргыг улсын наадамд дөрөвлүүлээд, Сүхбаатарт болсон зүүн бүсийн уралдаанд түрүүлгэсэн. Зүүн бүсэд дээр хэлсэн Энхболд гэдэг хүний сартай хул даагыг мөн айрагдуулсан. 


-2018 он бол та бүхний хувьд амжилт арвин жил байсан. 

-Тийм ээ. Сарт зээрд “Дүнжингаравын хурд”-д аман хүзүүдээд, зун нь улсын баярт түрүүлсэн. Улсын наадмын дараа Булган аймагт болсон хангайн бүсийн уралдаанд Сандагийн Нямжавын хээр хязааланг айрагдуулаад, Дорноговийн бүсэд зээрд азаргаа аман хүзүүдүүлсэн. Мөн говийн бүсэд Архангайн Энхболдын хул соёолон морь, миний өөрийн буурал даага түрүүлсэн. 
-Данзанравжаагийн 215 жилийн ой, говийн бүсийн уралдаанаас бараг гурван түрүү хүртсэн юм байна шүү дээ.
-Тийм. Хоёр түрүү, нэг аман хүзүү хүртсэн. 2019 оны улсын наадмаар Булган аймгийн Сайхан сумын харьяат Сандагийн Нямжавын хээр соёолонг дөрөвт давхиулаад, “Хотгойдын хурд”-д очиж Чинзориг ахын зээрд морийг  гуравт, хонгор даагыг нь дөрөвт давхиулсан. Өмнөговь аймагт болсон “Говьшанхын хурд-6” говийн бүсийн уралдаанд Энхболдын хээр хязааланг мөн айрагдуулсан. Тэгээд энэ жил хоёр түрүү хүртлээ. 
-Ингэж наадаж байгаа хүн улсын Шилдэг уяач болохоос яахав. Монгол Улсын чансаа өндөр уяачдын хэддүгээрт бичигдлээ. 

-2018 онд гурван түрүү, гурван айргийн амжилтаар чансаа өндөр есөн уяачийн долоод эрэмбэлэгдсэн. 


-Хэзээнээс эхэлж морь уясан юм бэ. Хэдэн онд аймгийн Алдарт уяач цол хүртсэн бэ?
-2014 онд аймгийн Алдарт уяач цол хүртсэн. Морь уях тухайд 17, 18-тайгаасаа эхэлсэн. Түүнээс өмнө өвөөгийнхөө уясан морьдыг унадаг байлаа. Миний өвөө Дорноговь аймгийн Сайхандулаан сумын уугуул, Сайншанд сумын харьяат, аймгийн арслан, аймгийн Алдарт уяач Намжилваанчигийн Цогбадрах гэж хүн бий. Намайг морь унадаг байх үед өвөөгийн хонгор азарга, цавьдар морь нь их хурдан байсан. 
-Залуу уяачид өөр шиг чинь амжилт үзүүлэхийн тулд юунд анхаарах хэрэгтэй вэ? Туршлагаасаа хуваалцаач. 
-Хаврын уралдаангүй болчихсон чинь хүмүүсийн мориндоо тавих анхаарал багасаад байх шиг санагддаг. Тиймээс уралдаангүй гэлгүй урьдынх шигээ эртнээс тэжээж байнгын бэлтгэлтэй байх нь чухал.
-100 жилийн ойг зохион байгуулах комиссынхонд дайх үг бий юу?

-Хууль дүрэм нь тодорхой бөгөөд уяачдын эрх тэгш байхад л сайхан наадчихна даа. 
-Хөлсний хашаанд баяртайгаар уулзахын ерөөл өргөе. Бас амжилт хүсье.
-Баярлалаа.

Б.Хастөр

2 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.