“Говийн хурд” галын уяач Д.Нямбаатар: Тод манлайгаас Жигүүр хул азарганых нь төлийг авсан

-Залуу уяачдын төлөөлөл болсон өөрийн тань хувьд хэзээнээс морь уяж байгаа вэ?
- 1998 он буюу  тавдугаар ангиасаа хойш морь уяж байгаа. Хамгийн анх овооны наадамд хээр морио арав дотор давхиулчихаад их урамшсан. Тэгээд 2000 оноос эхлэн аймгийн Алдарт уяач Ундрах болон Алдарт уяач Алтангэрэл ах нартайгаа хамтран морь уяж сумынхаа наадамд уралдуулах болсон доо. 2001 онд манай нутагт айхтар зуд болж, манайх хамаг адуугаа алдчихсан юм. Тухайн үед би хотод байсан л даа. Тэгээд нагац ах Өлзийбатаасаа нийлж байгаа битүү хээр морь авч уяад сумынхаа наадамд зургаалуулсан. Морь уяж түрүүлж, айрагдуулна гэдэг санаан зоргын хэрэг биш шүү дээ. Тэр хээр морио есөн  жил уяж байж сумынхаа наадамд айрагдуулсан. Хээр морь манай сумын адуучин Цэрэндагва гэдэг хүний хурдан халтар азарганы төл байгаа юм. Тэр азарганы төл болгон сайн харайж байгаа.
-Тод манлайгаас авсан адуу гэж байсан. Хотоос адуу авсан юмаа даа?
-Тэгсээн.  2008 онд Улаанбаатарт байхдаа нутгийн Тод манлай ах нартайгаа танилцаж нийслэлийн магнай хүлэг шалгаруулах уралдаанд тархилж байгаад сууж арваар ирсэн Сүхбаатар аймгийн  Баяндэлгэр сумын угшилтай нэг саарал азарга авсан юм. Харамсалтай нь ирсэн жилээ шөрмөс цохиод уралдаж чадаагүй. Тэгээд нутгийн ахаар хатгуулж дараа жил нь сумандаа түрүүлсэн. Тэр  жил Тод манлай уяач Ганбаатар Цэрэнжигмэд нар нутагтаа мялаалга наадам хийсэн юм. Тэр наадамд саарал азарга дөрвөөр давхисан. Ер нь саарал азарга гурав уралдахдаа нэг түрүүлж, хоёр айрагдсан.  Хоёр Тодоос Жигүүр хул азарганы угшлын бас нэг хээр азарга авсан. Тэр үед Ганбаатар Тод манлай “Жигүүр хулын төлүүд жаахан ааштай байдаг юм шүү” гэж хэлсэн. Үнэн юм билээ, хүүхдээ булгиж унагаагаад эсвэл хадуураад болохгүй байхаар нь хэдэн гүү хураалгачихсан байгаа.
 -Залуучууд зүүн зүгээс адуу их авчирдаг юм шиг байна. Өөрийн тань хувьд?
-Зүүн талаас  хоёр адуу авчирсан. Уяаг нь тааруулж чадахгүй байгаа юм байлгүй. Санаанд хүртэл давхихгүй  л  байна.  Бас найз Мөнхдэлгэртэйгээ хамт  Хэнтий аймгийн Баян-Адарга, Биндэр,  Сүхбаатар аймгийн Мөнххаан зэрэг сумдаас эр голдуу дааганууд авчирсан.
-Хурдны өлгий нутгаар явж дээ?
-Тэгсээн, манай тэр найз “Адуучин” нэвтрүүлэгт түрүүлсэн. Адуу сайн мэддэг хүн байгаа юм. Бид хоёр Мөнххааны Молом гэдэг өвгөнөөс хоёр даага аваад буцахдаа Хэнтийн  Биндэрт очин  “Найман шарга” уяачдын холбооны тэргүүэ Ганбаатар гэдэг хүнтэй танилцан адуунаас нь хэд хэдэн даага авсан.  Авчирсан үрээнүүд маань гайгүй сайн давхиж байгаа. Мөн нагац ах Өлзийбатыгаа 2011 онд Ховд руу шилжихэд нь би огт уягдаж байгаагүй битүү халтар морь авсан. Халтар морь Жаргалан сумын наадамд түрүүлээд, сумынхаа уяачдын баяр болон наадмаар гурвалж, аймагт есөлсөн.
-Өнгөрсөн хугацаанд ямархуу амжилт үзүүлсэн бэ?
-Сумынхаа наадмаас хоёр түрүү,  арав гаруй айраг авсан.
 -Уяачдын өргөөний анхны хандивлагч нь таныг гэж байсан?
 -Тиймээ, манай сум Монголдоо анх удаа уяачдын өргөөг байгуулсан. Тэр сайхан үйлсийг дэмжиж нэг сая төгрөг хандивлан салхийг нь хагалсан.
Залуучуудаа хошуучлан, нутгийн хурдаа сайжруулахыг хүсье. Ярилцсанд баярлалаа