Бахархан дуурайх баатар адуучин О.Мажиг

А.Тэлмэн
2015 оны 5-р сарын 14 -нд

Хутагтын өлгий нутгийн уяачид, адуучид, хурдан морины зүтгэлтнүүд бахархах, бардамнах зүйл олонтой. Эр зоригийн дууль их говийн зоригтнуудаараа, их хөдөлмөрийн шим эрэмгий адуучин Хөдөлмөрийн баатраараа тэд бахархахгүй байхын аргагүй. Өргөнчүүдийн төдийгүй морьтон монголчуудын бахархал болсон Монгол улсын Хөдөлмөрийн баатар О.Мажиг 1935 оны модон гахай жилийн өвлийн эхэн сард Сүхбаатар аймгийн Баяндэлгэр сумын нутаг дахь Бударын чулуу хэмээх газар малчин ард Одсүрэнгийн ууган хүү болон мэндэлжээ. Төрөлхийн ой тогтоолт сайтай, нягт нямбай, уйгагүй, тэсвэр хатуужилтай малд нүдтэй түүнийг аав нь их алдрын замд нь хөтөлсөн хэмээдэг.
1954 онд “Шинэ амьдрал” нэгдлийндарга Д.Даваасамбуугийн өрөөнд орлогч дарга Одсүрэн нь хүүгээ дагуулан орж ирж:
-Даргаа манай хүү адуучин болъё гэнэ. Яахав хэмээн асууж. Д.Даваасамбуу нүүрэндээ галтай нүдэндээ цогтой бор хүүгээс: “Сайн адуучин болж чадах уу” хэмээн асуувал нөгөө нь “чадна” хэмээн итгэлтэйгээр өгүүлсэн аж. Энэ ярианаас хойш удалгүй О.Мажигт 127 тооны адуу хүлээлгэн өгч адуучин Д.Буриадын туслахаар томилов. Хожмын нэрт адуучин Хөдөлмөрийн баатар болж байсан товч түүх энэ.  Энэ цагаас хойш 38 жил нийгмийн адуу маллахдаа анх авч байсан адуугаа үр төлөөр нь өсгөн үржүүлж 6000 гаруйд хүргэсэн байдаг. О.Мажиг нь адуу маллах хугацаандаа адууны зүй бус хорогдол ганцыг ч гаргаагүйн дээр 1054 гүүнээс 1060 унага бойжуулан авч, үйлдвэрлэлийн бусад төлөвлөгөөг жил бүр давуулан биелүүлж иржээ. Ийнхүү олон жил нэг төрлийн мал маллаж адуун сүргийг хариулан маллах төдийгүй уургалж барих, унаж эдлэх, уяж сойх эрдмийг гарамгай эзэмшсэн тул ажлын бүтээл  аж байдал, хөдөлмөрийн урам зориг нь дээшилж хамт олны дунд нэр хүнд нь өсөж ийнхүү тэргүүн зэрэгт хүрчээ. Тэрээр адууныхаа үүлдэр угсааг байнга сайжруулж, олон хурдан буян бий болгосон нь бас нэгэн давуу тал нь юм.
Үүний нэг жишээ нь 1977 онд Дэлгэрэх сумын уяач Үүжүү хэмээх Түдэвийн Дашнямаас хурдан хонгор азарга худалдаж авсан бөгөөд түүний төл хонгор азарга аймаг сумын наадамд олон айраг түрүү авч одоо ч үр төл нь хурдалсаар байна. Мөн сүүлийн жилүүдэд “Зангиат хээр” их насны морь нь сум, орон нутгийн наадамд  10-аад удаа түрүүлж айрагдсан билээ.
Адуучин О.Мажигийн адуу маллагааны арга барил нь бүтээлч дайчин шинж чанартай, шинжлэх ухааны үндэстэй практик  ач холбогдолтой болохыг ийнхүү төр засгаас үнэлж Улсын тэргүүний малчин, 1974 онд  БНМАУ ын Аварга малчин цол тэмдэг, Алтан гадас одонгоор хоёр удаа, бусад одон медалиудаар шагнаж байсан гэдэг. Харин БНМАУеын Хөдөлмөрийн баатар цол тэмдгийг 1976 онд өгсөн бөгөөд түүнчлэн  Сүхбаатарын одон, Алтан соёмбо медалиар шагнасан байдаг.
Мөн МАХН-ын XVII, XIX их хурлын гишүүн, Ардын их хурлын депутатаар хоёр удаа сонгогджээ.
О.Мажиг нь  1958 онд гэргий Т.Ядамцоотойгоо гэр бүл болж, улмаар таван хүүхэд төрүүлж өсгөж,  гарыг нь ганзаганд, хөлийг нь дөрөөнд хүргэж, тус тусын мэргэжил боловсрол ажил амьдралтай залгуулан хүний зэрэгт хүргэсэн ачтан юм.

"Тод магнай" сэтгүүл Дорноговь аймгийн тусгай дугаар

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна