Дик Френсис

Хурдан морины уралдааныг тойрсон элдэв луйврыг илчилж бичдэгээрээ алдартай жокей
Дэлхийн хамгийн алдартай жокей нарын нэг болох Дик Френсисийн жинхэнэ нэр нь Ричард Стэнли Френсис юм. Тэрээр 1920 оны 10-р  сарын 31-нд Их Британий Уэлс нэртэй нутагт төржээ. Хүүгийн гэр бүл олон үеэрээ адуу, хурдны морьтой холбоотой байжээ. Элэнц өвөө нь вангийн морин цэрэгт алба хааж, өвөө ба аав нь мэргэжлийн жокей байсан бөгөөд нэг их томгүй жүчээтэй байв.
Дикийн бага нас нь хурдан морьдын дунд өнгөрсөн бөгөөд тэрээр энэ тухай ярихдаа хөлд орохоосоо өмнө морь унаж сурсан гэдэг байв. 15 настайдаа мэргэжлийн жокей болохоор хатуу шийдээд, морь унахад боловсрол хэрэггүй гэж үзсэн болохоор сургуулиа хаясан байдаг. Ингээд 1930-аад оны дунд үеэс жокей болж амжилттай уралдаж эхэлжээ.
Түүнийг тун удалгүй Английн хамгийн алдартай жокей болно гэж бүгд ярьж байсан ч Дэлхийн хоёрдугаар дайн эхэлснээр энэ бүх төлөвлөгөө нь нурж орхив. Дик цэрэгт татагдан цэргийн нисгэгч болсон байна.
Дайн дууссан жил Дик эхнэр авч, 1946 оноос эхлэн морин спортод эргэн ороод удаа дараалан гайхалтай ялалт байгуулсан билээ. Түүний энэ бүх амжилтыг бүгд л онцолж байсан болохоор удалгүй вангийн жүчээний албан ёсны жокей болгож, цаашлаад  хатан хааны  жокей болох нь тэр. Үүний дараа арав гаруй жилийн туршид 350 гаруй удаагийн уралдаанд ялж, сепл чейзийн Их Британий олон удаагийн аварга болж байсан юм.
Харамсалтай нь 1957 онд болсон “Грэнд Нэшнл” тэмцээний үеэр маш хүнд гэмтэл авч, эмч нар морин спортоор хичээллэхийг нь эрс хатуу хоригложээ. Дик анхандаа эмч нарын дүгнэлттэй санал нийлэхгүй байсан ч хурдан морь унаж үнэхээр чадахгүй болсон гэдгээ ойлгожээ. Гэсэн ч сэтгэлээр унасангүй өөрийн туулсан амьдралынхаа тухай ном бичихээр шийджээ. Ном нь үнэхээр их амжилттай болж үндэсний хэмжээний бестселлер болсон байдаг.
 Улмаар номныхоо ачаар “Санди Экспресс” сонинд сэтгүүлчээр ажилд орж, 15 жилийн турш үр бүтээлтэй ажилласан юм. Тэрээр гол төлөв өмнөх мэргэжлийнхээ тухай буюу морин спорт, хурдны морьдын уралдааны талаар нийтлэл, шүүмж бичдэг байв. Ингэхдээ хурдан морины уралдааныг тойрсон элдэв луйврыг  ил тодоор илчилж байснаараа ихэд нэрд гарсан билээ. Түүний бичсэн нийтлэлээс болж хурдан морины уралдааны салбарт тухайн үедээ нэр алдартай байсан олон хүн ажлаа алдсан байдаг. Ингээд ч зогсохгүй, ор үндэсгүйгээр гүтгэгдэн  нэр хүндээ алдаад байсан хэд хэдэн жокей, жүчээний эздийн нэр төрийг өөрийн нийтлэлээрээ сэргээжээ.
Сэтгүүл зүйтэй зэрэгцэн Дик нь зохиол бичсэн хэвээр байжээ. Тэрээр эхнэрийн хамт зохиол бичдэг байжээ. Хамтдаа үйл явдлыг нь зохиож, эхийг нь Дик бичээд, эхнэр нь эцсийн байдлаар засварлана. Ингээд 1962 онд хамтдаа “Фаворит” нэртэй алдарт номоо бичсэн нь олон сая хувиар борлогджээ.
Энэ номоор маш олонд кино хийгдсэн байдаг. Тэрээр  Эдгар Погийн нэрэмжит Америкийн шагналыг авч, Английн детектив зохиолчдод өгдөг бүх  л шагналуудыг хүртсэн адтай нэгэн байв.
Дик Френсис 2010 онд өөд болжээ.